Եթե իշխանությունը նախագիծ բերեր, թե` ով կրի «դուխով» գլխարկ, բուժսպասարկման առաջնահերթություն կստանա` ՔՊ-ականները կողմ կքվեարկեին (տեսանյութ)

«Զինվորական ծառայության և զինծառայողի կարգավիճակի մասին» օրենքում փոփոխությունների օրինագծով առաջարկվում է զինծառայողների բուժօգնությունը դարձնել առաջնահերթ, արտահերթ և անվճար։ Կառավարությունը, սակայն, բացասական եզրակացություն է տվել։ Այս մասին նախագծի քննարկմանն ասաց ՀՀ ԱԺ Հայաստան դաշինքի պատգամավոր Արեգնազ Մանուկյանը:

«Պատճառն, ըստ ամենայնի, այն է, որ նախագիծը ներկայացված է ոչ իշխանության ներկայացուցչի կողմից։ Այլապես որևէ առարկություն չէր հնչի թե՛ կառավարության, թե՛ ՔՊ խմբակցության ներկայացուցիչների կողմից։

Ավելին, ես համոզված եմ, որ եթե իշխանությունն օրենսդրական նախաձեռնությամբ հանդես գար, որ, օրինակ, բոլոր այն մարդիկ, ովքեր կկրեն «դուխով» գրությամբ գլխարկներ, կստանան բուժսպասարկման առաջնահերթություն, ապա թե՛ կառավարությունը, թե՛ ՔՊ-ականները երկու ձեռքով կողմ կքվեարկեին այդ նախագծին։ Մի բան էլ ջանադրաբար կհիմնավորեին, թե հպարտ քաղաքացիներին ինչ առավելություն և արտոնություն է տալիս «դուխով» գլխարկ կրելը»,- ասաց Արեգնազ Մանուկյանը։

Նա նկատեց, որ իրականում մենք գործ ունենք բանակի շարունակական թուլացման ու անտեսման քաղաքականության հետ։ Այս նախագծով ընդգծվում է պատերազմող երկրի վերաբերմունքը մեր զինծառայողների նկատմամբ և նրանց կարևորությունը։ Սակայն, արդեն 3 տարի է, նաև դրանից առաջ էլ, այսօր իշխանության աթոռներին հայտնվածներից շատերը, դրսից ֆինանսավորմամբ և հրահրմամբ, հետևողականորեն վարկաբեկել են բանակը, զինվորականներին, հայրենիքի պաշտպաններին։ Որովհետև պետությունը քանդելու, ապականելու ճանապարհին ուժեղ բանակ և մարտական ոգի պետք չէ։