Պարոն Աբազյան, Նիկոլներն ու Ճտերը վաղ թե ուշ արևի լույսը ճաղերի հետևից են տեսնելու, գոնե Դուք ուսադիրները պատվով պահեք․ Արիանա Հովսեփյանը՝ ԱԱԾ պետին

NEWSPRESS.am լրատվական կայքի հիմնադիր-տնօրեն Արմենուհի (Արիանա) Հովսեփյանը ֆեյսբուքյան իր էջում գրել է․ 

Դիմում եմ ԱԱԾ պետ Արմեն Աբազյանին ու կփորձեմ կարճ կապել։ 

Ս․թ․ նոյեմբերի 11-ին դիմել էի ՀՀ գլխավոր դատախազություն՝ հաղորդում տալով հանցագործության մասին։ Դիմումում, հղում անելով Վարդան Ղուկասյանի լայվին, գրել էի, որ Range Rover մակնիշի ավտոմեքենաս վնասվել է Երևան քաղաքի ոստիկանության վարչության պետի տեղակալ Արթուր Զաքարյանի անմիջական ցուցումով։ 

Նաև պահանջում էի դադարեցնել Արթուր Զաքարյանի լիազորությունները՝ կապված նրա աշխատանքային գործունեության հետ, որպեսզի նա չխոչընդոտի քննությանը:

Նոյեմբերի 23-ին Գլխավոր դատախազությունից ստացել եմ հետևյալ պատասխանը․ 

«Հարգելի՛ տիկին Հովսեփյան, 

Ձեր կողմից ՀՀ գլխավոր դատախազին հասցեագրված դիմումն ուղարկվել է ՀՀ ազգային անվտանգության ծառայություն՝ դրանում նշված հանգամանքները ստուգման առարկա դարձնելու նպատակով։ 

Արդյունքների մասին կտեղեկացնենք լրացուցիչ»։ 

Գրությունը ստորագրել է ՀՀ ազգային անվտանգության ծառայությունում մինչդատական վարույթի օրինականության նկատմամբ հսկողության վարչության պետի տեղակալը։ 

Այժմ հարցերս ԱԱԾ պետին․ Դուք որևէ ասելիք, գործ չունե՞ք անելու, երբ Ձեզ հայտնում են, որ ոստիկանության Երևան քաղաքի վարչության պետի տեղակալը զբաղված է մարդկանց ահաբեկելով, խոսքի ազատությունը ճնշելով։ Դուք պաշտոնյա եք մի երկրում, որի ղեկավարությունը նույնիսկ պետության անվտանգությունն է դնում նժարի վրա՝ հակառակ նժարին թողնելով ժողովրդավարությունը։ Այսպիսի՞նն է Ձեր ու Ձեր ղեկավարության թվացյալ ժողովրդավարությունը։ Առնվազն ստուգելու պետք չունե՞ք այս հաղորդումը հանցագործության մասին։ Գլխավոր դատախազությունը հաճել է զբաղվել հաղորդումով, Դուք Ձեզ վե՞ր եք դասում գլխավոր դատախազությունից։ 

Շուրջ երկու շաբաթ անց ինձ որևէ մեկը չի զանգահարում, հարցաքննության չի հրավիրում, հասկանում եմ՝ զբաղված եք մարդկանց՝ պետության սահմաններն անառիկ պահող, հայրենիքը չզիջող նվիրյալներին կալանավորելով, բայց փորձեք գոնե ձեր՝ սպաների շարքերը փոքր-ինչ մաքուր պահել։ 

Եվ եթե առաջիկա օրերին Դուք և Ձեր ղեկավարած կառույցը շարունակեք անգործությամբ զբաղվել, այսինքն՝ հանցագործության բացահայտմամբ չզբաղվել, ապա ես կհասկանամ, որ Դուք շարքային հանցագործություն կոծկող եք, հանցակիցը շարքային Ճտերի։ Եվ կհասկանամ, որ Դուք անձամբ՝ պարոն Աբազյան, համաձայն եք խուլիգանություններին, որոնք ոմանք գործիք են դարձրել՝ ընդդիմադիրների ձայնը կտրելու համար։ 

Պարապ գործ է, չի ստացվելու։ Գոնե Ձեր անունը մաքրեք։ Նիկոլներն ու Ճտերը վաղ թե ուշ արևի լույսը ճաղերի հետևից են տեսնելու, գոնե Դուք ուսադիրները պատվով պահեք, եթե իհարկե, սեփական անձը հարգող սպա եք․․․ 

Հաջորդ անդրադարձս այսքան քաղաքակիրթ չի լինելու»։