Դատախազը պահանջում է կալանավորել «Ալֆայի Չիկոյին» և Արմեն Անդրեասյանին. որոշումը կհրապարակվի վաղը

Դատախազությունը պահանջում է կրկին կալանավորել Քաջարանի համայնքապետ Մանվել Փարամազյանի և մյուսների գործով մեղադրյալներ ԶՄՊԿ անվտանգության դեպարտամենտի նախկին ղեկավար, ԱԱԾ փոխգնդապետ Արամ Գասպարյանին՝ «Ալֆայի Չիկոյին» և Արմեն Անդրեասյանին։

Ինչպես արդեն տեղեկացրել ենք՝ Սյունիքի մարզի ընդհանուր իրավասության դատարանը՝ դատավոր Բորիս Բախշիյանի նախագահությամբ, քրեական գործը՝ դատաքննության նախապատրաստելիս քննել է Մանվել Փարամազյանի, Արամ Գասպարյանի և Արմեն Անդրեասյանի խափանման միջոցի հարցը։ Մանվել Փարամազյանի նկատմամբ ընտրված խափանման միջոց կալանավորումը թողնվել է անփոփոխ, իսկ Գասպարյանը գրավի դիմաց ազատ է արձակվել։ Ինչ վերաբերում է Անդրեասյանին, ապա նրա նկատմամբ նախաքննության ավարտական փուլում նախաքննական մարմնի կողմից գրավ էր կիրառվել՝ 20 մլն դրամի չափով, սակայն Անդրեասյանը հնարավորություն չի ունեցել վճարելու գրավի չափը, դատարանն էլ որոշել է գրավի չափ սահմանել 5 մլն դրամը, թեև դատախազը պահանջում էր կալանավորել վերջինիս։ Դատախազությունը վերաքննիչ բողոքներ է ներկայացրել՝ պահանջելով բեկանել առաջին ատյանի դատարանի որոշումը և կրկին կալանավորել Գասպարյանին և Անդրեասյանին։

«Փաստինֆո»-ի թղթակցի հաղորդմամբ՝ Վերաքննիչ քրեական դատարանում՝ դատավոր Արմեն Դանիելյանի նախագահությամբ, այսօր կայացել է դատախազության բողոքի քննությունը։ Մինչ բողոքի ըստ էության քննությանն անցնելը դատավոր Արմեն Դանիելյանը հետաքրքրվեց՝ արդյո՞ք կա ինքնաբացարկի միջնորդություն, ինչին ի պատասխան Մանվել Փարամազյանի փաստաբան Լուսինե Սահակյանը հայտարարեց՝ իրենց դիրքորոշումը դատավորին վաղուց է հայտնի, սակայն միևնույն է միջնորդություն ներկայացնելու դեպքում էլ այն կմերժվի, ուստի, միջնորդություն չեն ներկայացնում։ Մեղադրող դատախազ Ա. Գևորգյանը, ներկայացնելով բողոքի հիմնավորումները, մատնանշեց ամբաստանյալների կողմից գործի հնարավոր խոչընդոտման հավանականությունը՝ նշելով, որ քրեական գործով դատաքննությունը՝ ապացույցների հետազոտման փուլը դեռևս չի սկսվել, բացի այդ՝ վերջիններս հեղինակություն են վայելում, ունեն սոցիալական կապեր։

Անդրեասյանի պաշտպան Լուսինե Սահակյանն էլ, անդրադառնալով վերաքննիչ բողոքի հիմնավորումներին, արձանագրեց՝ փաստացի քննարկվում է գրավի չափի հարցը։ Ըստ փաստաբանի՝ գրավի չափը մեծացնելով՝ դատախազությունը փորձում է կալանավորել Անդրեասյանին։ Պաշտպան Երվանդ Վարոսյանն էլ արձանագրեց, որ մինչդատական վարույթում Անդրեասյանի նկատմամբ որպես խափանման միջոց է ընտրվել 20 մլն դրամի չափով գրավը, սակայն այժմ գործը դատարանում է, վարույթ իրականացնող մարմինը դատարանն է, որը գտել է, որ 5 մլն դրամի չափով գրավը բավարար է։ Բացի այդ՝ առկա է նաև իրավական կազուս, մասնավորապես, նախաքննության ընթացքում նախաքննական մարմինը կարող է գրավ կիրառել, իսկ գրավի չափը մուծված չլինելու պարագայում վարույթ իրականացնող մարմինն իրավունք ունի դիմելու առաջին ատյանի դատարան՝ դատական վերահսկողության սահմաններում քննարկելու անձին կալանավորելու կամ գրավի չափը նվազեցնելու հարցը, իսկ այժմ կազուսային իրավիճակ է ստեղծվել, երբ նախկին վարույթ իրականացնող մարմինը՝ ի դեմս դատախազության, դիմել է գործով վարույթ իրականացնող մարմնին՝ դատարանին, որն այլևս դատական վերահսկողության շրջանակներից դուրս է և փորձում է հայցել անձի նկատմամբ որպես խափանման միջոց կալանավորման կիրառումը, մինչդեռ, Վարոսյանը գտնում է, որ նման կարգավորում գրավի ինստիտուտը գործող Քրդատ օրենսգիրքը չունի։ Անդրեասյանի պաշտպանները խնդրեցին դատարանին մերժել բողոքը՝ անհիմն լինելու պատճառաբանությամբ, միևնույն ժամանակ նկատի ունենալ Անդրեասյանի առողջական վիճակը։

Մանրամասները՝ սկզբնաղբյուրում: