Աղետի գոտում մոտ 7200 ընտանիք բնակվում է տնակներում

«2020 թ. սկսվեց դեռևս 2008 թ.-ին սկիզբ դրված ծրագրի ավարտական փուլի մեկնարկը, որի շահառու ճանաչված ընտանիքների թիվն այս տարվա դրությամբ 5419 էր»: Այս մասին, այսօր՝ դեկտեմբերի 6-ին, մամուլի ասուլիսի ժամանակ այտնեց Քաղաքաշինության կոմիտեի բնակարանային ֆոնդի կառավարման և կոմունալ ենթակառուցվածքների վարչության պետ Տանյա Արզումանյանը՝ ներկայացնելով «Աղետի գոտու անօթևանների բնակարանային ապահովման պետական ծրագրի» ընթացքը:

«Մենք ավարտական փուլում ունեինք 242 շահառու, որոնցից 214-ի բնակարանային խնդիրների լուծման մեկնարկը տրվել է անցած տարի և քանի որ շահառուների հիմնական մասը գյուղական բնակավայրերի բնակիչներ են, նրանցից 187 ընտանիք որպես խնդրի լուծման տարբերակ ընտրել է բնակելի տների շինարարությունը, իսկ 20 ընտանիք ընտրել է բնակարանի գնման վկայագրի տարբերակը, 7 ընտանիք նախընտրել է ֆինանսական աջակցության տարբերակը»,-հայտնեց Տանյա Արզումանյանը:

Նրա խոսքով, առկա է նաև Շիրակի մարզի Ջրաձոր համայնքի 28 շահառու ընտանիքի խնդիրը՝ կապված Կապսի ջրամբարի կառուցմամբ բնակավայրի տեղափոխման գործընթացի հետ: Նրա խոսքով, Շիրակի, Լոռու և Արագածոտնի մարզերում առկա 7200 ոչ հիմնական շինություններ (տնակներ) որոնք զբաղեցված են բնակության նպատակով:

«Արդարադատության նախարարությունը իրավական հիմքեր է նախապատրաստել և 2023 թվականից պետք է տնակներից ազատվելու ծրագրեր մեկնարկեն՝ ֆինանսական միջոցների ներգրավմամբ»,- տեղեկացրեց Տանյա Արզումանյանը: