Լեգենդար հրամանատարին կալանքի տակ պահելը հանցագործություն է․ մտավորականները երաշխավորում են Աշոտ Մինասյանի ազատության համար (տեսանյութ)

ՀՀ դատախազության շենքի դիմաց բողոքի ակցիա կազմակերպած «Ձայն հայրենեաց» նախաձեռնությունը և մշակույթի գործիչները նամակ հանձնեցին դատախազությանը։

Նրանք պահանջում են ազատ արձակել Արցախյան երեք պատերազմների մասնակից, «Սիսական» ջոկատի հրամանատար, գնդապետ Աշոտ Մինասյանին:

Ընթերցելով դատախազին ուղղված նամակը, մշակութային գործիչ Սամվել Հարոյանը լրագրողների հետ զրույցում նկատեց, որ այս պահին դիմումի տակ ստորագրել է 22 մտավորական, սակայն վստահություն հայտնեց, որ ակցիայի մասին տեղեկանալով, ստագրողների թիվը կանցնի 100-ից։

«Դատախազությունը մտավախություն ունի, թե Աշոտ Մինասյանը կարող է թաքնվել կամ խոչընդոտել հետաքննող մարմին։ Մենք դիմում ենք դատախազաությանը և երաշխավորում, որ Աշոտ Մինասյանը, լինելով ազատության մեջ, բոլորովին չի խոչընդոտի նախաքննող մարմնին իր գործողություններով, ինչպես որ չի խոչընդոտել մինչև այժմ»,-ասաց հարոյանն ու նկատեց, որ բոլոր հավաքվածները երաշխավորում են անձամբ կրել պատասխանատվություն, եթե Աշոտ Մինասյանը թաքնվի կամ խոչընդոտի։

Նա վստահեցնում է, որ լեգենդար հրամանատարին կալանքի տակ պահելը ուղղակի հանցագործություն է։

Հիշեցնենք, որ դատախազը Վերաքննիչ դատարանի որոշման դեմ վճռաբեկ բողոք էր ներկայացրել՝ պնդելով, թե Մինասյանն ապօրինի ձեռք է բերել մեծաքանակ զենք, ռազմամթերք, պայթուցիկ նյութեր եւ սարքեր, դրանք տեղափոխել եւ պահել իրեն պատկանող շինությունում՝ քննության տվյալ փուլում ինքնությունը դեռեւս չբացահայտված անձանց հետ նախնական համաձայնությամբ։ Վճռաբեկ դատարանն արձանագրել էր, որ ապօրինի զենք-զինամթերք պահելու դրվագով առկա է հիմնավոր կասկած, իսկ ահա Փաշինյանի սպանության ենթադրյալ նախապատրաստման եւ իշխանության յուրացման դրվագներով՝ ոչ։

Ըստ այդմ՝ Վճռաբեկ դատարանը մասնակի բավարարել է դատախազության բողոքը եւ գործն ուղարկել առաջին ատյանի դատարան՝ նոր քննության:

Առաջին ատյանի դատարանը վերջերս քննել է Մինասյանի նկատմամբ կալանավորումը որպես խափանման միջոց ընտրելու մասին միջնորդությունը եւ կրկին մերժել։ Դատախազությունը վերաքննիչ բողոք է ներկայացրել՝ պահանջելով բեկանել առաջին ատյանի դատարանի որոշումը եւ կալանավորել Մինասյանին, ինչն այսօր բավարարվել է։