Լեռնակերտ գյուղը կապող կամրջի մի հատված փլուզվել է. երթևեկությունը դարձել է միակողմանի ու կա վտանգ, որ փլուզումը կշարունակվի և գյուղի կապը արտաքին աշխարհից կկտրվի

Այսօր՝ նոյեմբերի 29-ին, արտակարգ դեպք է տեղի ունեցել Շիրակի մարզում: Ինչպես հայտնում է Shamshyan.cօm-ը՝ Պեմզաշեն գյուղից դեպի Լեռնակերտ գյուղ տանող ավտոճանապարհի երկաթբետոնե կամրջի որոշ հատված փլուզվել է: Բարեբախտաբար, ուժածներ չկան և նշված հատվածում երթևեկությունը դարձել է միակողմանի:

Օպերատիվորեն ժամանել է Արտակարգ իրավիճակների նախարարության փրկարար ծառայության թիվ 49 հրշեջ-փրկարարակա ջոկատից 1 մարտական հաշվարկ: Փրկարարները Լեռնակերտ համայնքի ղեկավար Մովսես Մովսիսյանի հետ սահմանազատել են տարածքը, իսկ ճանապարհային ոստիկանության 2-րդ սպայական գումարտակի 2-րդ վաշտի 3-րդ դասակի ավագ տեսուչներ Վարդգես Հարոյանն ու Գագիկ Կարապետյանը գյուղի սկզբնամասում ծառայութուն են կատարում և նշված հատվածով անցնող վարոդներին զգուշացնում և հորդորում են, որպեսզի ուշադիր լինեն: Համայնքի ղեկավար Մ. Մովսիսյանը տեղեկությունը օպերատիվորեն փոխանցել է Շիրակի մարզպետ Նազելի Բաղդասարյանին, ում կարգադրությամբ էլ մարզպետարանի համապատասխան վարչության պատասխանատուներն արդեն ժամանում են գյուղ՝ տեղում խնդրին ծանոթանալու և լուծումներ գտնելու համար:

Ֆոտոլրագրողը հայտնում է, որ կամուրջը կառուցվել է 60-ականներին, երկարությունը 10 մետր է, լայնությունը՝ 6 մետր: Եթե կարճ ժամանակում այն հիմնովնի չվերանորոգվի, ապա ամեն պահի հնարավոր է՝ մյուս հատվածն էլ փլուզվի ու գյուղը կտրվի արտաքին աշխարհից: