Պուտինն Ալիևի հետ զրույցում ափսոսանք է հայտնել, որ ԼՂ-ում մինչ օրս միջադեպեր են գրանցվում և մարդիկ են զոհվում

ՌԴ նախագահ Վլադիմիր Պուտինն ափսոսանք է հայտնել, որ Լեռնային Ղարաբաղում մինչ այժմ խնդիրներ են առաջանում և պարբերաբար հնարավոր չի լինում խուսափել զոհերից։

«Ցավոք սրտի, կան խնդիրներ, կան միջադեպեր։ Ցավոք սրտի, մինչ այժմ հնարավոր չի լինում խոսափել զոհերից»,- ասել է ՌԴ ղեկավարը՝ նշելով, որ նպատակահարմար է շարունակել եռակողմ ձևաչափով տարածաշրջանում իրավիճակի կարգավորման շուրջ բանակցությունները։ «Որոշ ժամանակ անց մեզ կմիանա Հայաստանի վարչապետը [Նիկոլ Փաշինյանը], և մենք կշարունակենք այս քննարկումը»,- ասել է նա՝ բացելով երկկողմ հանդիպումը Ադրբեջանի նախագահ Իլհամ Ալիևի հետ։

Միաժամանակ Պուտինը նշել է ռուս խաղաղապահների դրական դերը Լեռնային Ղարաբաղում իրավիճակի կարգավորման գործում։

«Ինչ վերաբերում է Լեռնային Ղարաբաղի կարգավորմանը <․․․> այստեղ մեր խաղաղապահները, ինձ թվում է, դրական դեր են խաղում, ռուս-թուրքական զինադադարի կառավարման կենտրոնն արդյունավետ է աշխատում»,- ասել է նա։

Պուտինի գնահատականով՝ պետք է քննարկել այն, ինչ արդեն արվել է, և ինչ դեռ պետք է անեն բոլորը, «որպեսզի ոչ միայն նման բան այլևս չառաջանա, այլ ընդհակառակը, պայմաններ ստեղծվեն իրավիճակը հանգստացնելու համար, ինչպես նաև տարածաշրջանում ստեղծվի այնպիսի իրավիճակ, որը թույլ կտա մարդկանց հանգիստ ապրել, իսկ երկրներին՝ զարգանալ»։

Ռուսական պետության ղեկավարը նշել է, որ ուրբաթ օրվա առանցքը դառնալու է Ռուսաստանի Դաշնության, Ադրբեջանի և Հայաստանի ղեկավարների եռակողմ հանդիպումը՝ նվիրված Ղարաբաղի շուրջ իրավիճակի կարգավորմանը։

«Քիչ առաջ ես խոսեցի իմ գործընկերների հետ, օրինակ՝ ՌԴ կառավարությունից, որոնց դուք լավ գիտեք, և որոնք զբաղվում են տարածաշրջանում տնտեսական խնդիրների, տրանսպորտային միջանցքների ապաշրջափակման հարցերով։ Խոսել եմ նաև Պաշտպանության նախարարի հետ, ԱԴԾ տնօրենի հետ, որին ենթարկվում է Ռուսաստանի սահմանապահ ծառայությունը, և որը զգալի ներդրում ունի կարգավորման գործում»,- ասել է Պուտին՝ հավելելով, որ այս թեմայով բազմաթիվ հարցեր կան։