Ձմեռ է գալիս, դիմակը ցրտից կպաշտպանի. Փաշինյանի կատակից միայն իր ծիծաղը եկավ (տեսանյութ)

Կորոնավիրուսի թվերը նվազել են, բայց չպետք է թուլացնել զգոնությունը: Այս մասին կառավարության հերթական նիստում ասաց Նիկոլ Փաշինյանը:

«Այնպես, ինչպես 2020 թվականից կառավարում ենք կորոնավիրուսի համավարակը, առնվազն այլ երկրների հետ համեմատած, չենք կարող ասել, որ վատ է կառավարվել, ինչը շատ լավ է, բայց մեր հիմնական ուղղությունը պետք է լինի պատվաստումները», - ասաց նա:

Առողջապահության նախարար Անահիտ Ավանեսյանն էլ տեղեկացրեց, որ ընդհանուր իրականացվել է 1 միլիոն 168 հազար 501 պատվաստում:

Նախարարի խոսքով` արդեն իրականացնում են այն քաղաքացիների վերապատվաստումը, ովքեր վեց ամիս առաջ են պատվաստվել:

«Մեկ-երկու օրվա ընթացքում կհաստատվի հստակ կարգերը, թե ինչպես քաղաքացիները կարող են ստանալ վերապատվաստումը»,- ասաց նա:

Ավանեսյանը նշեց, որ հիվանդանոցային բուժում ստացող 3124 քաղաքացիներից 114-ն է, որ պատվաստված է:

Նա վստահեցրեց` պատվաստանյութերը որևէ կերպ չեն անդրադառնում մարդու վերարտադրողական առողջության վրա:

Արդարադատության նախարար Կարեն Անդրեասյանը հետաքրքրվեց` հնարավո՞ր է մոտ ապագայում թույլ տալ, որ բացօթյա տարածքներում այլևս դիմակ կրելը պարտադիր չլինի:

«Բայց հիմա ձմեռ է գալիս, մարդկանց դեմքը դիմակով ավելի պաշտպանված կլինի: Երևանի ու Հայաստանի շատ տարածաշրջանների կտրող ցրտին դիմակով շատ ավելի հեշտ կլինի շնչել, այնպես որ՝ եկեք գարնանը դրա մասին մտածենք։ Չէ, կատակ եմ անում, ըստ իրավիճակի պետք է կողմնորոշվել», - արձագանքեց Նիկոլ Փաշինյանը: