Ի՞նչն էր խանգարում ՀՀ կառավարությանը 1 տարի առաջ կամ այսօր օգնություն խնդրել այլ երկրներից. Արա Աբրահամյան

Այսօր փաշինյանական թիմը զբաղվում է հայ հասարակությունում ռուսաֆոբ տրամադրությունների նպատակային ներդրմամբ, մարդկանց մոլորեցնում են Ռուսաստանի իրական դերը 44-օրյա արյունահեղությունը դադարեցնելու և հետպատերազմյան խաղաղություն պահպանելու գործում: Այս մասին նշել է Ռուսաստանի հայերի միության նախագահ Արա Աբրահամյանը՝ մարզային վարչությունների պետերի հետ տեսազանգի ժամանակ՝ անդրադառնալով Հայաստանում տիրող իրավիճակին:

Աբրահամյանը նկատում է, որ Փաշինյանն Անվտանգության խորհրդի քարտուղարի և իշխող պատգամավորների բերանով փորձում է շանտաժի ենթարկել Ռուսաստանին, քանի որ, եթե Ռուսաստանը չօգնի Հայաստանին, ապա Փաշինյանը դիմելու է մյուս գործընկերներին:

«Կուզեի հարցնել. ի՞նչն էր խանգարում Հայաստանի կառավարությանը մեկ տարի առաջ կամ այսօր օգնություն խնդրել տարբեր երկրներից և միջազգային կազմակերպություններից։ Ռուսաստա՞նը։ Ո՛չ, իհարկե:

Ռուսաստանի հետ դաշնակցային հարաբերությունները ոչ մի կերպ չեն խանգարում, եւ Ռուսաստանն էլ երբեք դեմ չի եղել, որ Հայաստանը համագործակցի կամ օգնություն խնդրի այլ երկրներից: Եթե Հայաստանի կառավարությունը գիտի երկրներ և գործընկերներ, ովքեր ուզում են և կարող են օգնել մեր երկրին այս ճակատագրական պահին և չի դիմում նրանց, ապա դա, կներեք, հանցագործություն է իր ժողովրդի դեմ»,-ասել է նա:

Արա Աբրահամյանի գնահատմամբ՝ նման հայտարարությունները պարզապես դրանց հեղինակների իրական մտադրություններն ու գործողությունները քողարկելու միջոց են, որը տանում է հակառուսական տրամադրությունների և հասարակության շրջանում արհեստական ​​բորբոքման:

ՌՀՄ նախագահի ամբողջական ելույթը NEWSPRESS.am-ը ներկայացնում է՝ այս հղմամբ։