Ինչո՞ւ մարտական գործողություններից 2-3 օր հետո մոտ 2 տասնյակ զինծառայողների մասին որևէ տեղեկություն չկա. Տիգրան Աբրահամյան

Նոյեմբերի 16-ին Ադրբեջանի վերջին ագրեսիայից հետո կրակի դադարեցման պայմանավորվածությամբ էլ իրավիճակն ամբողջությամբ հանգուցալուծված չէ, լարվածության օջախը մարված չէ: Այս մասին ԱԺ ճեպազրույցի ժամանակ հայտարարեց  «Պատիվ ունեմ» խմբակցության պատգամավոր Տիգրան Աբրահամյանը:

Նա նշեց, որ նախ պետք է հասկանալ պատճառները, թե ինչ իրավիճակում տեղի ունեցավ այս նոր ագրեսիան, և Ադրբեջանն իրականում ինչ խնդիր էր դրել իր առջև:

Երկրորդ կարևոր հանգամանքը, որ պետք է հասկանալ, ըստ նրա այն է, թե բացի նրանից, որ բռնազավթում է ապահովել ՀՀ տարածքների նկատմամբ, իրականում ի՞նչ նոր այլ սպառնալիքներ է ստեղծել ՀՀ-ի համար:

«Պետք է հասկանալ նաև, թե ինչո՞ւ այդ գործողություններից 2-3 օր հետո մոտ 2 տասնյակ զինծառայողների մասին որևէ տեղեկություն չկա»,-նկատեց Աբրահամյանը:

Նա բավականին մտահոգիչ համարեց ադրբեջանական տարբեր տելեգրամյան ալիքներում հրապարակվող տեսանյութերը՝ հայ զինծառայողներին բռնությունների, խոշտանգումների ենթարկելու վերաբերյալ:

«Նրանց ֆիզիկական գոյության առումով այսօր մենք ունենք բավականին խնդրահարույց իրավիճակ: Անկախ այն հանգամանքից, թե նրանք ինչ հանգամանքներում են անհետ կորել կամ գերեվարվել, մեր գլխավոր խնդիրը, որպես ՀՀ, պետք է լինի այդ մարդկանց հրատապ ձևով հայրենադարձումը: Դրանից հետո, թե ինչ ընթացակարգեր կլինեն, արդեն օրենքով սահմանված են»,- ասաց Աբրահամյանը:

Պատգամավորը նշեց նաև, որ նոյեմբերի 16-ին Ադրբեջանի սանձազերծած մարտական գործողությունների դադարեցումից հետո իր մեջ մտահոգություն է առաջացել, թե ինչ գին է ունենալու դա: «Իրականում ինչի շուրջ է եղել ռազմական գործողությունների դադարեցումը»,- ասաց նա:

Աբրահամյանը չի կարծում, թե իրավիճակը ամբողջությամբ հանգուցալուծված է, լարվածության օջախը, որը եղել է մինչև այս գործողությունների ծավալումը, դեռևս մարված չէ: «Այս պահին եղած իրավիճակը ոչ միայն շարունակում է բարձր ռիսկեր պարունակել նոր զարգացումների առումով, այլ՝ քաղաքական և բանակցային առումով էլ որոշակի հարցերի տեղիք է տալիս»,- ասաց նա: