Ամուսինը կանխել է հղի կնոջ նկատմամբ սեռական ոտնձգությունը

ՀՀ քննչական կոմիտեի Արագածոտնի մարզային քննչական վարչության վարույթում քննվող քրեական գործով մեղադրանք է առաջադրվել 35-ամյա տղամարդուն` հղի կնոջ նկատմամբ սեռական բնույթի բռնի գործողությունների փորձ կատարելու համար։

2015թ.  դեկտեմբերի  06-ին ահազանգ էր ստացվել Արագածոտն մարզի երիտասարդ հղի կնոջից՝ իր նկատմամբ իրենց ընտանիքի բարեկամի կողմից  բռնաբարության փորձ կատարելու վերաբերյալ, ինչը կանխվել էր ամուսնու կողմից։

Դեպքի առթիվ դեկտեմբերի 11-ին ՀՀ քննչական կոմիտեի Արագածոտնի մարզային քննչական վարչությունում հարուցվել է քրեական գործ՝ ՀՀ քրեական օրենսգրքի 34-138-րդ հոդվածի 2-րդ մասի 6-րդ կետի հատկանիշներով (բռնաբարության փորձ՝ ակնհայտ հղի կնոջ նկատմամբ)։ Նույն օրը որոշում է կայացվել` հղի կնոջը տուժող ճանաչելու մասին։

Քննությամբ պարզվել է, որ ընտանիքի բարեկամը դեպքի օրը հյուրընկալվել է երիտասարդ զույգին եւ օգտվելով ամուսնու՝ տանը չլինելու հանգամանքից՝ բռնություն է գործադրել հղի կնոջ նկատմամբ, հարվածել եւ փորձել սեռական բնույթի գործողություններ կատարել, ինչը կանխվել է ժամանակին տուն վերադարձած ամուսնու կողմից, իսկ տղամարդը դիմել է փախուստի։

Քրեական գործի շրջանակներում ձեռնարկված միջոցառումների արդյունքում դեպքի վայրից փախուստի դիմած անձը հայտնաբերվել է, եւ նախաքննությամբ ձեռք բերված ապացույցների համակցությամբ դեկտեմբերի 17-ին նրան մեղադրանք է առաջադրվել՝ ակնհայտ հղի կնոջ նկատմամբ սեռական բնույթի բռնի գործողությունների փորձ կատարելու համար՝ ՀՀ քրեական օրենսգրքի 34-139-րդ հոդված 2-րդ մասի 6-րդ կետով։

Նույն օրը միջնորդություն է ներկայացվել դատարան՝ մեղադրյալի նկատմամբ որպես խափանման միջոց կալանավորումը կիրառելու մասին, ինչը բավարարվել է։

Նախաքննությունը շարունակվում է, միջոցներ են ձեռնարկվում` գործի բոլոր հանգամանքների բազմակողմանի, լրիվ եւ օբյեկտիվ հետազոտումն ապահովելու ուղղությամբ։