Եթե ընդդիմությունը զուտ որպես քաղաքական ակցիա հանձնում է մանդատները՝ պրագմատիկ առումով արդյունավետ չէ. այլընտրանքային պայքար է անհրաժեշտ. Քաղտեխնոլոգ

Քաղտեխնոլոգ Վիգեն Հակոբյանն անդրադարձել է խորհրդարանական ընդդիմության մանդատները հանձնել-չհանձնելու հարցին ու դրա հետ կապված հնարավոր լուծումներին։

Նա Aysor.am-ի թղթակցի հետ զրույցում ասել է, թե՝ երբ խորհրդարանական ընդդիմությունը խոսում է մանդատները վայր դնելու մասին, ապա մի հարթակից հրաժարվելու դեպքում պետք է այլընտրանք առաջարկի։

«Ենթադրենք՝ ընդդիմությունն ԱԺ-ից դուրս եկավ. և ի՞նչ։ Եթե այնտեղից դուրս ես գալիս, ենթադրվում է, որ ամբողջ թափով տեղափոխվում ես փողոց։ Շատ մեծ այընտրանքներ ես չեմ տեսնում։ Եթե ընդդիմությունը մանդատները վայր դնելուց առաջ հայտարարում է, որ պառլամենտական ճանապարհով չի կարողանում որևէ հարց լուծել, իշխանությունն էլ իր հերթին որևէ քայլ չի անում, որպեսզի ընդդիմության ձայնը լսելի լինի, ապա նույն ընդդիմությունը պետք է նաև հայտարարի, որ հասկացել է՝ խորհրդարանը խնդիրներ լուծելու ճանապարհ չէ, և միայն փողոցային պայքարով է հնարավոր հարցեր լուծել։ Սա արդեն ճանապարհ է», - ասաց Վիգեն Հակոբյանը։

Քաղտեխնոլոգի խոսքով, եթե ընդդիմությունը պարզապես հանձնում է մանդատները՝ զուտ որպես քաղաքական ակցիա՝ դրանով իսկ սահմանափակելով իր ռեսուրսները, սա պրագմատիկ առումով այնքան էլ արդյունավետ չէ։

«Այլ հարց է, եթե դու քաղաքական ճգնաժամ ես առաջացնում, բայց ամբողջ թափով սկսում ես դրսում աշխատել՝ ամենօրյա պիկետներ, երթեր, պետական նշանակության շենքերի պարալիզացում, փողոցների փակում, պետական ապարատի աշխատանքների խոչընդոտում, հեռուստատեսության գրավում և այլն։ Այսինքն՝ ես ասացի այն, ինչ 2018 թվականին մի շարք ՀԿ-ների հետ արել է Նիկոլ Փաշինյանը», - նշեց Հակոբյանը։

Մեր զրուցակիցը կրկին շեշտեց՝ զուտ քաղաքական ակցիայից բացի, ընդդիմությունը, մանդատները վայր դնելուց անմիջապես հետո, պետք է ցույց տալ, որ խորհրդարանի հույսին չի մնացել։

«Բայց ես միշտ համարել եմ, որ առկա ռեսուրսները մեկը մյուսին չպետք է սահմանափակեն։ Խորհրդարանում խմբակցություն ունենալը որևէ կերպ չի բացառում փողոցում քո ակտիվությունը։ Դու կարող ես և՛ պառլամենտում ամբիոն ունենալ, և՛ փողոցային պայքարի տարբերակն աշխատեցնել։ Սա ռեզոնանսային արդյունք է տալիս։ Բայց դա ընդդիմության որոշելիք հարցն է», - ասաց Վիգեն Հակոբյանը։

Նյութն ամբողջությամբ՝ սկզբնաղբյուր կայքում․