Ո՞րն է լինելու ընդդիմության հաջորդ քայլը և միանո՞ւմ են արդյոք Թագուհի Թովմասյանի առաջարկին. Աննա Մկրտչյանի պատասխանները

Գործիքակազմը պիտի լինի շատ ճկուն: Եթե դուք պատկերացնում եք, որ մենք այսօր  լինենք Ազգային ժողովի դահլիճում՝ այն մարդկանց սպասելով, ովքեր մեղավոր են այն տեսանյութերի գոյության մեջ, որոնք մենք տեսել ենք: ՀՀ սուվերեն պետությունում զինվորներին ծնկի բերելու պատճառն այն մարդիկ են, ովքեր այսօր նստած են ԱԺ և Կառավարության մեծամասնության աթոռներին: Այս մասին այսօր լրագրողների հետ ճեպազրույցում ասաց ԱԺ «Պատիվ ունեմ» խմբակցության պատգամավոր Աննա Մկրտչյանը՝ պատասխանելով հարցին, թե ընդդիմության հաջորդ քայլը ո՞րն է լինելու:

«Սրանց հետ հարցուպատասխան պատկերացնել այն ֆորմատով, որով իրենք են ենթադրում, ես կարծում եմ՝ դուք շատ լավ տեսել եք, որ որևէ հարց պատասխան չի ստանում: Մենք ցանկացած հարց, երբ բարձրացնում ենք, վստահ տեսնում ենք, որ դրան պատասխան չի լինում: Այդ մարդիկ չունեն դրա պատրաստակամությունը, դրա ցանկությունը և իրենք շատ պարզ հայտարարում են, որ ինչ տրամաբանությամբ ուզում են, այդ տրամաբանությամբ էլ շարժվում ենք»: 

Հարցին, թե միանո՞ւմ են Թագուհի Թովմասյանի առաջարկին՝ մանդատները վայր դնելու վերաբերյալ, Մկրտչյանը պատասխանեց. «Այդ առաջարկի մասին պարբերաբար թե՛ «Հայաստան», թե «Պատիվ ունեմ» դաշինքի պատգամավորները խոսել են՝ մանդատը գործիք է, մեխանիզմ է, մեթոդ է՝ նաև իրականությունը բացահայտելու և իրականության բացահայտման հետևանքները ցույց տալու հանրությանը: Ինչ վերաբերում է մանդատի գոյությանը, ապա այստեղի փափուկ աթոռներին նստելն այսօրվա ընդդիմադիրներից որևէ մեկի նպատակների մեջ չի մտնում, առավել ևս մարդկանց հետ, ում մենք համարում ենք ՀՀ դավաճաններ, մարդկանց հետ, ովքեր փորձում են ՀՀ մասնատված և ավերված վիճակը ներկակացնել նորմալ»,- ասաց նա:

Ճշտող հարցին, թե ճիշտ չի՞ համարում մանդատի վայր դնելը, Մկրտչյանն ասաց, որ այս պահին գործիքակազմ ասելով նկատի ունի մանդատի գոյությունը: