Պատրաստ եմ մեկ անգամ էլ բեմից ընկնել, եթե դա քաղաքացիներին կօգնի ճիշտ ընտրություն կատարել. Արկադի Լալազարյանը՝ բեմից ընկնելու մասին (տեսանյութ)

Համացանցում տարածվել էին տեսանյութեր, որտեղ նոյեմբերի 12-ին, Կապանում կազմակերպված քարոզարշավի ժամանակ կապանցի հաղորդավար, դերասան Արկադի Լալազարյանը բեմից ընկավ ցած:

NEWSPRESS.am-ն ներկայացրել էր, թե ինչպես են 2 ՔՊ-ական «գահավիժում» բեմից և նշել, որ բեմահարթակին կանգնած ՔՊ-ականներից ոչ ոք, այդ թվում՝ Արկադի Լալազարյանի կողքին էր կանգնած փոխվարչապետ Սուրեն Պապիկյանը և ՔՊ ավագանու թեկնածու Էդիկ Հովսեփյանը, չօգնեցին նրան:

Ավելին, նրանք հանգիստ շարունակեցին իրենց ելույթները:

ԼՈՒՐԵՐ.com-ն էլ զրուցել է Արկադի Լալազարյանի հետ:

Վերջինս նշել է, թե լուրջ վնասվածք չի ստացել, չնայած այն հանգամանքին, որ բեմը բավականին բարձր էր. «Բարեբախտաբար, ընկնելուց լուրջ վնասվածքներ չստացա, միայն մի քանի քերծվածք եղավ, ոտքս մնաց ինչ-որ տեղ և ձեռքերով կարողացա սիրուն վայրէջք կատարել: Շատ ուժեղ անձրև էր տեղում, հատակն էլ այնպիսին էր, որ սահում էր և ոտքս սայթաքեց, գլորվեցի ցած՝ լիքը մարդկանց պատճառելով ծիծաղ»,- նշեց նա՝ հավելելով, որ այդ ամենին շատ նորմալ է վերաբերվում, անգամ, ինքն էլ մինչև այսօր ծիծաղում է:

Մեր այն հարցին, թե ինչու գործընկերները իրեն օգնության ձեռք չմեկնեցին և արդյոք վիրավորված է նրանց անտարբերությունից, նա պատասխանեց. «Գործընկերներս չմոտեցան ինձ, որովհետև հենց ընկա, բեմի հետնամասից նորից բարձրացա բեմ և շարունակեցի քարոզարշավը: Իրականում մարդիկ արդեն ուզում էին դադարեցնել քարոզարշավը, բայց ես հենց հասկացա դա, միանգամից բարձրացա բեմ, ասացի՝ ամեն ինչ կարգին է, շարունակե՛ք»,- ասաց Արկադի Լալազարյանը:

Նա նաև կատակել է, թե. «Պատրաստ եմ մեկ անգամ էլ ընկնել, եթե դա մեր քաղաքացիներին այս ծանր, բացասական մթնոլորտում դրական լիցքեր կհաղորդի և կօգնի ճիշտ ընտրություն կատարել»։