Երևանի աղբահանության հիմնարկն արձագանքել է իրենց վերաբերյալ շրջանառվող լուրերին

Օրեր առաջ տեղեկացրել էինք, որ Երեւանի քաղաքապետարանի «Երեւանի աղբահանություն եւ սանիտարական մաքրում» համայնքային հիմնարկի աղբահանության կառավարման բաժնի նախկին պետ Արթուր Բաբայանը դիմել էր «Հայկական ժամանակի» խմբագրություն և հայտնել, որ երբ վարակված է եղել կորոնավիրուսով և ինքնամեկուսացել, իրեն ապօրինի ազատել են աշխատանքից: Այդ մասին լուրեր են շրջանառվել նաեւ այլ լրատվամիջոցներում։

Այդ կապակցությամբ Երեւանի աղբահանություն եւ սանիտարական մաքրում համայնքային հիմնարկի ֆեյսբուքյան էջը տարածել է հաղորդագրություն, որում նշվում է, որ դրանք ամբողջությամբ մտացածին են, չեն համապատասխանում իրականությանը և ավելին՝ մեկ անձի կողմից հրահրված զրպարտությունների ու ապատեղեկատվության արդյունք են։

«Ավելորդ և ոչ պատեհ ենք համարում անդրադառնալ անգամ հիշյալ անձնավորության մեղադրանքներին, որը աշխատանքից ազատվել է ՀՀ աշխատանքային օրենսգրքի նորմերի և հիմնարկի ներքին կարգապահական կանոնների կոպիտ ոտնահարումների պատճառով։

«Երևանի աղբահանություն և սանիտարական մաքրում» համայնքային հիմնարկը մշտապես համագործակցել է և շարունակելու է համագործակցել պետական համապատասխան մարմինների հետ՝ նպաստելու համար օրինականության և արդարության վերականգնմանը, պարզապես այս պահին մենք զերծ կմնանք ստուգումների մասով որևէ տեսակետ հայտնելուց և մեկնաբանություններից՝ մինչև համապատասխան մարմինների կողմից հստակ եզրակացությունների ստացումը։

Այս մասին պաշտոնական հայտարարություն կլինի միայն վերը նշված փաստերի առկայության պարագայում՝ քննության ավարտից հետո»,- ընդգծել են գրառման մեջ:

«Մեզ համար չափազանց կարևոր են ցանկացած խնդրի բացահայտումը և օրինականությունը, ու մեր քաղաքացիների գնահատականը մեզ համար առաջնահերթ են։

Ամենայն պատասխանատվությամբ հայտարարում ենք, որ Համայնքային հիմնարկն իր տրամադրության տակ գտնվող բոլոր ռեսուրսներն ուղղում է և ուղղել է մեր երկրի և ՀՀ քաղաքացիների բարօրությանը, իր առջև դրված բարդ խնդիրները մշտապես իրականացրել է ուժերի ներածին չափով։ Այդ իսկ պատճառով հորդորում ենք, օգտվել միայն պաշտոնական տեղեկատվությունից, հիմնվել ողջամիտ փաստերի և պատասխանատու անձանց հայտարարությունների վրա, որով մեծ օժանդակություն կցուցաբերեք մեր լարված աշխատանքի բնականոն իրականացմանը:

Հիշեցնում, որ հանցագործության համար մեղադրվողը համարվում է անմեղ, քանի դեռ նրա մեղավորությունը ապացուցված չէ օրենքով սահմանված կարգով՝ դատարանի օրինական ուժի մեջ մտած դատավճռով, և վստահեցնում, որ այսուհետ ցանկացած անհիմն մեղադրանք ստանալու է համապատասխան իրավական ընթացք»,- հավելել են աղբահանության հիմնարկից եւ հետգրությամբ ավելացրել, որ բանակին տրամադրած աջակցության բոլոր փաստերն անխտիր արձանագրված են և՛ իրենց մոտ, և՛ ՊՆ-ում։

«Դրանք որևէ պարագայում հրապարակային շահարկելն ընդհանրապես բարոյական չենք համարում, այլ պարզապես կկցենք նախատեսվող գործին՝ որպես լրացուցիչ ապացույցներ»։