«ԱրմենՏել»-ը պետբյուջե կվճարի 20 մլն դրամ

ՀՀ Վճռաբեկ դատարանի որոշմամբ, «ԱրմենՏել» ընկերությունը պարտավորվում է պետական բյուջե վճարել ՀՀ ՏՄՊՊՀ կողմից կիրառված 20 միլիոն դրամ տուգանքը: Այս մասին newspress.am-ին տեղեկացրեցին ՏՄՊՊՀ-ից:

Հիշեցնենք, որ ՀՀ Տնտեսական մրցակցության պաշտպանության պետական հանձնաժողովը «Օրանժ Արմենիա» ընկերության դիմումի հիման վրա հարուցել էր վարչական վարույթ: Վարույթի հիմք է հանդիսացել այն, որ «ԱրմենՏել» ընկերության մեկնարկած «Պարզից Պարզ» անվանմամբ սակագնային փաթեթը կրկնօրինակում էր մրցակից ընկերության՝ «Օրանժ Արմենիայի» «Պարզ» անվանումով փաթեթին: Ընդ որում, վերջինը վերոնշյալ անվանումը դեռևս 2011-ին գրանցել է մտավոր սեփականության գործակալությունում՝ որպես սպասարկման նշան:

Բացի այդ, «ԱրմենՏել» ընկերության «Պարզից Պարզ» սակագնային փաթեթի գովազդում ներկայացված էին նարնջագույն և կարմիր գույներով ներկված բիլիարդի գնդակներ՝ ակնհայտորեն մատնացույց անելով շարժական կապի մյուս 2 օպերատորներին, որոնք խաղի ընթացքում համարվում են պարտված:

ՏՄՊՊՀ-ն նշել էր, որ «ԱրմենՏելի» նման վարքագիծը վնասում է մյուս օպերատորների համբավին և գործարար վարկանիշին, ինչն անբարեխիղճ մրցակցության դրսևորում է: ՏՄՊՊՀ որոշմամբ, օրենքի խախտման համար, «ԱրմենՏելը» տուգանվել էր 20 միլիոն դրամի չափով:

«ԱրմենՏելը» ՏՄՊՊՀ որոշումը բողոքարկել է դատական կարգով. դատական բոլոր 3 ատյաններում ՏՄՊՊՀ-ի որոշումը մնացել է անփոփոխ: