Ճարտարապետությունը անկում է ապրում բիզնես շահերի պատճառով. (տեսանյութ)

«Ճարտարապետությունը սերտ կապված է երկրի տնտեսության հետ եւ եթե կա տնտեսության աճ, ճարտարապետությունը եւս ակտիվանում է, այս տարի ճարտարապետության ոլորտում անկում է եղել, կային շատ նախագծեր, որոնք այդպես էլ չիրականացվեցին»,-Անդրադարձ մամուլի ակումբում լրագրողների հետ զրույցում նշեց Հայաստանի ճարտարապետների միության նախագահ Մկրտիչ Մինասյանը:

Նա նաև մատնանշեց ձեռքբերումները, ըստ նրա՝ այս տարվա ձեռքբերումներից էր Շահումյան հրապարակի վրա կառուցված նախարարությունների շենքը: Հաջորդ տարի նախատեսվում է Ազգային պատկերասրահի համար նոր շենք կառուցել, բայց դա էլ դեռ հստակ չէ:

Ճարտարապետ Սաշուր Քալաշյանն էլ նշեց, որ ճարտարապետների ամենակարեւոր խնդիրն այժմ ճարտարապետական հուշարձանների պահպանությունն է, որը հաճախ շատ դժվար է լինում, շահերի բախումներ կան. «Այսօր երբեմն իրավիճակներ են լինում, որ մենք ստիպված ծայրահեղ միջոցների ենք դիմում մեր հուշարձանները պահպանելու համար, քանի որ դրանք հիմնականում պետության եւ հասարակության ուշադրությունից դուրս են: Հիմնական պատճառն այն է, որ ճարտարապետներին համախմբող մարմին չկա, որն ավելի է դժվարացնում ճարտարապետների աշխատանքը», -ասաց Սաշուր Քալաշյանը:

Մանրամասները՝ տեսանյութում