ՀԱԿ-ը պատրաստվում է ՀՀ դատախազություն ներկայացնել 100-ից ավելի գործեր

Այն, որ Սահմանադրական դատարանը մերժել է ԱԺ ՀԱԿ խմբակցության ներկայացրած դիմումը` բնավ չի նշանակում, որ չեն ընթերցի մեր կողմից ուղարկված նամակը, քանի որ մենք նամակը փոստով ուղարկել ենք ՍԴ:
newspress.am-ի հետ զրույցում այդ մասին հայտնեց ՀԱԿ խմբակցության քարտուղար Արամ Մանուկյանն` անդրառադնալով հանրաքվեի արդյունքները Սահմանադրական դատարանում վիճարկելու նպատակով ԱԺ ՀԱԿ խմբակցության նախաձեռնությամբ կազմակերպված ստորագրահավաքին:

Հիշեցնեք, որ Սահմանադրական դատարանը դեկտեմբերի 18-ին մերժել է ՀԱԿ դիմումը, քանի որ անհրաժեշտ քանակով ստորագրություններ չեն հավաքվել:

«Չնայած 27 ստորագրություն չկարողացանք հավաքել, բայց մենք հետևողական ենք մեր նախաձեռնությանը: Այս պահին նամակն արդեն ՍԴ-ում է և դատարանը պետք է մեզ պատասխանի 50 աշխատանքային օրվա ընթացքում»,- ասաց Արամ Մանուկյանը` հավելելով, որ մինչ այդ, արդեն 2 օրից, ՀԱԿ-ը պատրասվում է ՀՀ դատախազություն ներկայացնել 100-ից ավելի գործեր` քրեական գործ հարուցելու նպատակով:

«Հիմա արդեն մենք մեր ձեռքին ավելի շատ փաստեր ունենք, որոնք կարող ենք ներկայացնել դատախազությանը: Մենք հետևողական ենք մեր մեև նախաձեռնությանը»,- ասաց ՀԱԿ խմբակցության քարտուղարը:

Նա հավելեց, որ ամեն ինչ անելու են, որպեսզի միջազգային կառույցների ուշադրությունը հրավիրեն դեկտեմբերի 6-ին տեղի ունեցած ընտրակեղծիքների վրա:

Հիշեցնենք, որ դեկտեմբերի 15-ից ՀԱԿ խմբակցության կողմից նախաձեռնված ստորագրահավաքին միացել էր 19 պատգամավոր: Ավելի վաղ ե՛ւ նախաձեռնության հեղինակները, ե՛ւ այն ստորագրողներն ու չստորագրողները կարծիք էին հայտնել, որ ՀԱԿ-ին չի հաջողվի հավաքել 27 ստորագրություն եւ դիմել Սահմանադրական դատարան. ՀՅԴ-ն ՍԴ դիմելու գործընթացը համարել է անպտուղ աշխատանք, ԲՀԿ-ի գնահատմամբ՝ այն տանում է փակուղի: