«Աշնանային պարահանդես-2021» համահայկական ամենամյա փառատոնը՝ Վանաձորի «Տաթև» արվեստի կենտրոնի նախաձեռնությամբ (ֆոտո, վիդեո)

Վանաձորի «Տաթև» արվեստի կենտրոնի նախաձեռնությամբ հերթական անգամ մեծ շուքով անցկացվեց համահայկական փառատոն։ «Աշնանային պարահանդես-2021»-ին մասնակցել են Հայաստանի բոլոր մարզերի և Երևան քաղաքի պարային խմբեր։ Փառատոնի ավելի քան 400 մասնակից պարային տարբեր ոճերում հանդես եկան 2 փուլով։ Նախ իրենց գեղեցիկ կատարումներով ու բեմականացումներով ելույթ ունեցան  3-11 տարեկանները, ապա բեմ բարձրացան 12-ից բարձր տարիքային խմբի կատարողները։

Փառատոնն անցկացվեց Վանաձորի Հովհաննես Աբելյանի անվան պետական դրամատիկական թատրոնում, որի հյուրընկալ դռները փառատոնի մասնակիցների համար սիրով բացվել էին տնօրեն Լուսինե Սահակյանի աջակցությամբ։

Հատկանշական է նաև, որ յուրաքանչյուր տարիքային խմբի ելույթի ավարտին մասնակիցների համար նախապատրաստված էր պարային «հրավառություն»․․․

«Տաթև արվեստի ակումբի» հիմնադիր տնօրեն Ֆլորա Ասոյանը և գեղարվեստական ղեկավար Տաթև Գալստյանը ջանք չէին խնայել, որ հրավիրվածները լիարժեք վայելեն օրն ու դահլիճից հեռանան բարձր տպավորություններով։ 

Թե ինչպես որոշվեց փառատոնը դարձնել ամենամյա, կազմակերպիչներն իրենց բացատրությունն ունեն։

NEWSPRESS.am-ի հետ զրույցում Տաթև Գալստյանը նշեց, որ նախորդ տարիների փորձը ցույց տվեց, որ փառատոնն ինքնանպատակ չէ։

«Փառատոնի կազմակերպումը ցույց տվեց, որ այն բավականին դրական է անդրադառնում մասնակիցների ստեղծագործական կյանքի ու հետագա գործունեության վրա. մասնակիցները հաղորդակցվում են միմյանց հետ, կիսում ընդհանուր գիտելիքներն ու իրար փոխանցում ձեռք բերած փորձը։ Սա է պատճառը, որ փառատոնը դարձավ ավանդույթ»,-ասաց փառատոնի գեղարվեստական ղեկավարը։

Միջոցառման բոլոր մասնակիցները, կազմակերպիչներ՝ Ֆլորա Ասոյանի ու Տաթև Գալստյանի կողմից ստացան շնորհակալագրեր և պատվոգրեր, իսկ խմբերի ղեկավարներն ստացան մրցանակ-գավաթներ։ Դրանք պատրաստված էին տերևի տեսքով և մատուցվեցին որպես «Աշնանային պարահանդես» խորհրդանիշ։

Իր հերթին, փառատոնի հիմնադիր տնօրեն Ֆլորա Ասոյանը համայնքապետարանի կողմից պարգևատրվեց շնորհակալագրով՝ նման փառահեղ միռոցառման կազմակերպման համար և մշակութային կյանքում իր ներդրած ավանդի համար։

«Մշակութային ցանկացած գործչի, արվեստագետի, արտիստի համար այս կերպ գնահատված լինելն իհարկե, մեծ նշանակություն ունի, սակայն արվեստագետն իրականում իրեն ավելի շատ գնահատված է զգում, երբ նա տեսնում է իր արած գործի արդյունքն ու լսում  դահլիճից եկող ծափողջյունները։ Ես ինքս չեմ ուզում գնահատել այն, ինչ արվել է այսօր. դուք տեսաք այս բեմում երեխաների ոգևորությունը, նրանց փայլող աչքերն ու լսեցիք մասնակիցների հարազատների ողջունի ու հիացմունքի խոսքերը։ Դրանք արդեն ամեն ինչ ասում են։ Դահլիճից եկող այդ ջերմությունն անկեղծ գնահատականն է` մեր կատարած աշխատանքի»,֊մեզ հետ զրույցում ասաց Ֆլորա Ասոյանը` համեստորեն լռելով այն կուլիսային դժվարությունների մասին, որոնք հաղթահարել են ու ստացել այս արդյունքը։

Կազմակերպիչները սիմվոլիկ շնորհակալագրերով իրենց երախտագիտությունն ու շնորհակալությունն արտահայտեցին բոլոր նրանց, ովքեր իրենց աջակցել են պարահանդեսային փառատոնի իրականացման ճանապարհին։ 

Օրինակ՝ փառատոնի խորհրդանիշ հանդիսացող գեղեցիկ տերևի տեսքով մրցանակների և պատվոգրերի ձևավորման հարցում կազմակերպիչներին աջակցել է Optimist հրատարակչությունը՝ Արմեն Բրուտյանի անմիջական մասնակցությամբ։

Ի դեպ, այդ շարքում Ֆլորա Ասոյանն ու Տաթև Գալստյանն անձանձնահատուկ շնորհակալ են նաև Վանաձորի Ստեփան Զորյանի անվան տուն-թանգարանի անձնակազմին։

Բանն այն է, որ  «Տաթև» արվեստի կենտրոնին կից գործող կամավորները՝ Տարոն Գասպարյանի գլխավորությամբ, օգնել են ակտիվ կազմակերպել Հայաստանի տարբեր շրջաններից ժամանած երեխաների ժամանցը՝ Վանաձորում։

Կազմակերպիչները նկատում են, որ թեև տուն-թանգարանի համար օրը ոչ աշխատանքային էր, սակայն աշխատակիցներն անտրտունջ, ավելին՝ մեծ սիրով, իրենց հյուրընկալ դռները բացել ենթարկել համայնքերից ժամանած հյուրերի համար, ինչի համար էլ շնորհակալ են իրենց աջակիցներին։

Արմինե Մկրտումյան