Որտեղի՞ց մեզ այդքան գումար. քաղաքապետը` մանկապարտեզի վերանորոգման մասին

Վանաձորի թիվ 31 մանկապարտեզը, ուր հաճախում է 130 երեխա, վերջին անգամ 1988թ-ի երկրաշարժից հետո էր վերանորգվել ու շահագործման հանձնվել:

Այդ օրից անցել էր ավելի քան 2 տասնյակ տարի: Մանկական հիմնարկի գեղեցիկ կառույցից մնացել էր խոնավությունից քայքայված պատերն ու անհրապույր մասնաշենքը:

Newspress.am-ի հետ հարցազրույցում մանկապարտեզի տնօրեն Սուսաննա Գրիգորյանը նշեց, որ դիմել է բոլոր պատկան մարմիններին, մասնավորապես Վանաձորի քաղաքապետարանին, որի ենթակայության ներքո էլ ի դեպ գործում է հիմնարկը, սակայն տարիներն անցել են, իսկ սայլը տեղից չի շարժվել:

«Վերջերս ԱԺ ՀՀԿ խմբակցության ղեկավար Վահրամ Բաղդասարյանի աջակցությամբ սկսել ենք մանկական հիմնարկի շինարարությունը, բայց գույքի ձեռքբերման հարցը դեռևս օրակարգում է»,-ասաց Սուսաննա Գրիգորյանը:

Քաղաքապետարանի ենթակայության ներքո գործող մանկապարտեզը հույսը դրել է դրամաշնորհային ծրագրերի վրա. տնօրենը խոստովանում է` տարիների փորձը ցույց է տվել, որ քաղաքապետանից ակնկալիքներ չի կարող ունենալ:

Նկատենք նաև, որ երբ մանկապարտեզի տնօրենը դիմել է քաղաքապետին գույքի ձեռքբերման հարցում օգնելու համար, վերջինս պատասխանել է, թե իրենք գումար չունեն:

«Ձե’ր գումարով Ձեր հարցերը լուծեք»,-պատասխանել է Սամվել Դարբինյանը:

Խնդրի շուրջ newspress.am-ը զրուցեց Վանաձորի քաղաքապետ Սամվել Դարբինյանի հետ: Վերջինս, չգիտես ինչու, զարմանքով ու ագրեսիվ նկատեց, որ յուրաքանչյուր մարդ իրեն պահանջատեր է պատկերացնում. «Որտեղի՞ց մեզ այդքան գումար, իսկ չե՞ք մտածում ծնողի վճարած հինգ հազար դրամ վարձով ինչպես ենք մենք պահում երեխաներին: Դե ասեք, տեսնեմ, որտեղի՞ց մեզ այդքան գումար…»,- չէր հանգստանում Դարբինյանը:

Նկատենք, որ հենց այս ֆոնի վրա էլ Վանաձորում դեռ բարձրանալու են մանկապարտեզի վարձավճարները: Այստեղ հարց է առաջանում, ինչ ակնկալիքներ ունի քաղաքապետը այդ գումարներից, եթե մանկապարտեզների տնօրենների խոսքով վարձավճարներով ոչ կոմունալ վճարումներն են կատարվում, ոչ էլ գոնե կոսմետիկ վերանորոգումներ են իրականացվում:

Մեզ մոտ աղբյուրներից տեղեկացել ենք, որ քաղաքապետը ուշադրության կենտրոնում է պահում միայն իր հարազատ-բարեկամների մանկապարտեզները: