Նա իրավունք չունի ղեկավարել այդ հանձնաժողովը, նա պետք պետք է հրավիրվի հանձնաժողով և խելոք պատասխանի հարցերին. Ղազինյանը՝ Քոչարյանի մասին

Հայաստանում տեղի է ունեցել պատմական մասշտաբի աղետ: Մեր հազարավոր հերոսների արյամբ ձեռք բերված հաղթանակն ուղղակի նվիրվեց թշնամուն: Այս մասին այսօր «Պատերազմի քննիչ հանձնաժողովի անհրաժեշտությունը. հետպատերազմյան ապաքինում» թեմայով քննարկման ժամանակ ասաց ԱԺ «Հայաստան» խմբակցության պատգամավոր Արթուր Ղազինյանը:

«Այս անգամ նվերի ձևն ընտրվեց պատերազմի միջոցով: Ինչ-որ մի ժամանակ, եթե մեզ ասեին, որ իշխանություննները ցանկանում են Արցախի հանձնում իրականացնել, և դա պետք է արվի պատերազմով, մոտավորապես պետք էր պատկերացնել այս սցենարը, հատկապես ոչ թե 44-օրվա, այլ վերջին 3 տարվա կտրվածքով: Այսինքն՝ ԶՈւ գնումների պլանների փոփոխությունը, բանակցային գործընթացի զրոյացումը, փակուղի մտցնելը, հետագայում նաև մարտական գնդերի կրճառումը, սպառազինությունը, հրամանատարական կազմի հաճախակի փոփոխությունը, անվտանգային համակարգի հետևողական կազմաքանդմանն ուղղված աշխատանքները: Այդ ամբողջը շղթայի մեջ է»,- ասաց Ղազինյանը: 

Նրա խոսքով՝ զարմանալի էր, որ ունենալով իրավապահ մարմինների նկատմամբ գրեթե 100 տոկոսանոց ազդեցություն և իմանալով, որ կարելի է քրեական գործերի հարուցման միջոցով վարել իրավական նախաքննություն՝ նրանք հրաժարվեցին ըստ էության բովանդակային, բազմակողմանի հետաքննությունից և որոշեցին քննությունը տեղափոխել քաղաքական հարթակ՝ ԱԺ քննիչ հանձնաժողով: 

«Ընդհանրապես, քննիչ հանձնաժողովի ստեղծումը հանդիսանում է ընդդիմության զինանոցում գտնվող գործիք, որով կարողանում է հակազդել իշխանության լծակներին, բայց այս անգամ իշխանություննն առաջ ընկավ և ինքը որոշեց դա ձևավորել»,- ասաց բանախոսը: 

Նա հիշեցրեց, որ իշխանությունը մի քանի անգամ չի ավարտել հանձնաժողովի ձևավորումը:

«Հիմա իրենք քննարկում են արտախորհրդարանական «հաճախորդների ակումբից» համալրել հանձնաժողովը և ընդդիմության ձեռքից վերցնել 1/4-ը, որովհետև 1/4-ի պարագայում մենք կարող ենք պահանջել և ստանալ ցանկացած փաստաթուղթ, պահանջել և ստանալ ներկայություն ապահովել ցանկացած պետական անձի, մենք կաշկանդված չենք լինի հարցերի քանակով, հարցերի խորությամբ և հարցաքննությունը տեղի է ունենալու ընդդիմության 4 ներկայացուցիչների կողմից: Եվ այս փորձերը՝ «հաճախորհների ակումբից» համալրել այս հանձնաժողովը, ևս խոսում է այն մասին, որ նրանք չունեն վստահություն և համոզմունք այս կազմով, որով ունենք մենք հանձնաժողովը, նրանց կհաջողվի կոծկել, քողարկել թաքցնել փակել պատերազմի իրենց գործած հանցանքների էջը»,- նշեց Ղազինյանը: 

Նա նկատեց, որ իշխանական կուլուարներում շրջանառվում են անուններ, թե ովքեր կարող են լինել այդ հանձնաժողովում և դատելով այդ անուններից՝ հասկանում ես, որ գառներին ուզում են ի պահ տալ գայլերին, այսինքն՝ մարդիկ, ովքեր պետք է ներկայանան այդ հանձնաժողովին, ովքեր անմիջական մասնակցություն պատասխանատվություն ունեն պատերազմի ընթացքի և ելքի համար, իրենց պետք է վստահեն այս պատմական մասշտաբի աղետի քննությունը: Սա զավեշտ է, մենք այդ հարցը բարձրացրել ենք նաև հանձնաժողովի նախագահի պարագայում, որը նույնպես պատերազմի ժամանակ հանդիսացել է իշխող ռազմաքաղաքական իշխանության բարձրագույն ներկայացուցիչ, ով խորհրդարանում օժտված է առաջնային մանդատով՝ ղեկավարել է ԱԺ պաշտպանության և անվտանգության հարցերի մշտական հանձնաժողովը, նա ևս իրավունք չունի ղեկավարել այդ հանձնաժողովը: Նա ևս պետք է հրավիրվի այդ հանձնաժողով, նրան պետք է տրվեն հարցեր, նա պետք է խելոք պատասխանի այդ հարցերին և հանձնաժողովը պետք է եզրակցությունն ընդունի»,- ասաց Ղազինյանը՝ նկատի ունենալով Անդրանիկ Քոչարյանին: