Այս պատերազմը չպետք է լիներ, եթե ունենայինք, նորմալ, խելամիտ և ոչ արկածախնդիր իշխանություն. Գեղամ Նազարյան

Տիեզերական օրենք է՝ պարտություն բերած քաղաքական ուժը, հատկապես դրա առաջնորդը, պետք է հեռանա: Դա գլխավոր նախապայմանն է մեր երկրի զարգացման և մեր ողնաշարը ուղղելու համար: Այս մասին այսօր «Պատերազմի քննիչ հանձնաժողովի անհրաժեշտությունը. հետպատերազմյան ապաքինում» թեմայով քննարկման ժամանակ ասաց «Հայաստան» խմբակցության պատգամավոր Գեղամ Նազարյանը: 

«Մեզ հարցնում են՝ դուք մեղադրո՞ւմ եք իշխանություններին այս պատերազմը ժամանակին չդադարեցնելու համար: Այո, իհարկե, մեղադրում ենք, բայց ամենամեծ մեղադրանքն այն է, որ մենք ասում ենք՝ այս պատերազմը չպետք է լիներ, եթե ունենայինք, նորմալ, խելամիտ և ոչ արկածախնդիր իշխանություններ»:

Նա հիշեցրեց, որ իրենց խմբակցությունը նախաձեռնել էր օրենսդրական նախաձեռնություն, որով առաջարկվում էր ծանր պատիժ սահմանել, օրինակ, քննիչ հանձնաժողովում սուտ ցուցմունք տված պաշտոնյաներին, ինչը կառավարությունը մերժել է:

«Պարզ է դառնում, չէ՞, ինչու են մերժում, թվում է՝ իրենք պետք է առաջինը նման նախաձեռնությամբ հանդես գան: Նախ՝ չեն գալիս, մենք ենք հանդես գալիս, այդ առաջարկը մերժվում է ինչ-որ մտացածին պատճառով և հետ է ուղարկվում լրամշակման համար: Այս հարցերը հուշում են, թե այս վարչախմբի նպատակը որն է: Նրանք ունեն մի նպատակ, որն անիրագործելի է. նրանք ուզում են հասնել նրան, որ մենք, հանրությունը, բոլորը մոռանան, որ պատերազմ է եղել, որ տղերք ենք կորցրել պատերազմում, մոռանանք, որ Շուշին նվիրել ենք Ադրբեջանին»,- ասաց Նազարյանը: