Ո՞վ է իրավունք տվել ԱԽՔ-ին ՄԻՊ փոփոխության հարց քննարկել, ես ինչքա՞ն ասեմ, որ ես քաղաքականությամբ չեմ զբաղվում, հերիք չի՞ ձեր վախերը ցուցադրեք. Թաթոյան (տեսանյութ)

Անվտանգության խորհրդի քարտուղարը գերազանցել է իր լիազորությունները: Ընդհանրապես, ո՞վ է իրավունք տվել նրան ՄԻՊ փոփոխության հարց քննարկել: Այս մասին այսօր մամուլի ասուլիսում ասաց ՄԻՊ Արման Թաթոյանը՝ անդրադառնալով ԱԽՔ Արմեն Գրիգորյանի հայտարարությանը, թե ՄԻՊ բոլոր հայտարարությունները քաղաքական բնույթի են, և մի քանի ամիս հետո իրենք առաջադրելու են իրենց թեկնածուին:

«Սա բացահայտ ոտնձգություն է ՄԻՊ անկախ հաստատության նկատմամբ, այն է՝ գործադիր իշխանության համակարգի բարձրաստիճան պաշտոնատար անձի կողմից, և քանի որ Հայաստանում կա մարմին, որ հանրային ծառայողի վարքագծի կանոնների խախտումների համար հարուցում է վարույթներ, պատասխանատվության ենթարկելու հարց է լուծում՝ դա Կոռուպցիայի կանխարգելման հանձնաժողովն է, ես պաշտոնապես դիմելու եմ Կոռուպցիայի կանխարգելման հանձնաժողով: Այդ մարդն իր հայտարարությունների համար պետք է ենթարկվի պատասխանատվության, որպեսզի ապահովվի Հայաստանի ՄԻՊ անխափան, անկաշկանդ, անկախ աշխատանքը նաև հետագայում»,- ասաց ՄԻՊ-ը:

Թաթոյանը նախ նշեց, որ ԱԽՔ-ն չի կարելի շփոթել ԱԱԾ-ի հետ, ապա շեշտեց, որ ԱԱԾ-ն երկրի բացառիկ կարևոր հաստատություններից է, իսկ ԱԽ քարտուղարի արարքներն անվտանգության հետ կապ ընդհանրապես չունեն: 

ՄԻՊ-ի խոսքով՝ Գրիգորյանն այն անձը չէ, ում ինքը ժամանակ կհատկացներ, բայց քանի որ համակարգային խնդիր կա՝ հետևողականորեն աշխատանք է տարվում բոլոր ուղղություններով վարկաբեկել ՄԻՊ աշխատանքը, ապա ինքն ուզում է մի քանի հարցի անդրադառնալ:

«Ի՞նչ է ասում այդ մարդը, որ ես՝ որպես ՄԻՊ, ընդհանրապես անաչառ չեմ, և քաղաքական հայտարարություններ անելը: Ծիծաղելի է, որովհետև երկու օր առաջ Վենետեկի հանձնաժողովն ամենաուժեղ զեկույց է ընդունում ՀՀ ՄԻՊ-ի վերաբերյալ, ամրագրում է A կարգավիճակը և ասում է, Մաշտպանն առանցքային դերակատար է երկրում մարդու իրավունքների, ժողովրդավարության համար»,- ասաց բանախոսը: 

Թաթոյանը նաև մի շարք դրվագներ հիշեցրեց 2018 թվականի իշխանափոխության դեպքերից, երբ ինքը՝ որպես ՄԻՊ, այցելել է ու խնդիրներ է լուծել այն մարդկանց համար, ովքեր բերման են ենթարկվել, ձերբակալվել են և այժմ բարձրաստիճան պաշտոնատար անձինք են: «Այն ժամանակ անաչառ էի, հիմա դադարե՞լ եմ անաչառ լինելուց»,- ասաց Թաթոյանը՝ հավելելով, որ այդ մարդկանց շարքում եղել է նաև Գրիգորյանը:

«Ասում է, թե քաղաքական հայտարարություններ եմ անում: Տո՛, ինչպե՞ս է համարձակվում վարկաբեկել Հայաստանի Մարդու իրավունքների պաշտպանի աշխատանքը: Ասում է՝ սահմանային հարցերը քաղաքական են: Տո, ես ինչքա՞ն ասեմ, որ ես քաղաքականությամբ չեմ զբաղվում, հերիք չի՞ ձեր վախերը ցուցադրեք: Սահմանային հարցերը մարդու իրավունքներից կտրված չի կարելի դիտարկել, ժողովո՛ւրդ: Այս զեկույցն ամբողջությամբ դա է: Պետք չի տանել ռազմաքաղաքական տանիքի տակ մտցնել, այդպես մենք դարձնում ենք աշխարհաքաղաքական խաղերի զոհը: Բա պա՞րզ չի, որ սա Ադրբեջանի համար ամենաձեռնտու մոտեցումն է՝ մարդու իրավունքներից, էս իրավական հարցերից կտրել, տանել ռազմաքաղաքական դաշտ»: 

Մանրամասները՝ տեսանյութում