Սաշիկ Սարգսյանը թալանում է վարորդներին. Զարուհի Փոստանջյան

«Ասա վերջին հանգուցալուծումդ խնդրեմ»:

ԱԺ-ում Ժառանգություն խմբակցության պատգմավոր Զարուհի Փոստանջյանի հայտարարություն անելու առաջարկին այսպես արձագանեց ԱԺ նախագահ Գալուստ Սահակյանը:
Սակայն հազիվ էր Փոստանջյանը երկու բառ ասել, երբ Գալուստ Սահակյանն անջատել տվեց նրա խոսափողը և շարունակեց ներկայացնել քվեարկության դրվող նախագծը:

Զարուհի Փոստանջյանը սակայն չէր լռում:

Խոսք վերցրեց ԲՀԿ խմբակցության ղեկավար Նաիրա Զոհրաբյանը: Նրա խոսքով՝ թեև Ճանապարհային երթևեկության խախտումներին վերաբերող օրենսդրական նախաձեռնության նախագիծը լիարժեք չէ, սակայն չի կարելի ասել, որ այն չի լուծում մի շարք այլ խնդիրներ: Նա մասնավորապես դժգոհություն հայտնեց արագաչափերի չարաշահումից:

«Որտեղ մի սաղարթախիտ ծառ են գտնում, արանքին արագաչափ են տեղադրում: Մենք կողմ ենք քվեարկում ակնկալելով, որ առաջիկայում որոշակի փոփոխությունների պետք է ենթարկվի»:
ՀԱԿ խմբակցության պատգամավոր Նիկոլ Փաշինյանն էլ նկատեց, որ նախկին օրենքը վարորդների կոկորդից բռնել էր նշանակում: Այս փոփոխությանը նա կողմ է քվեարկելու այն բանի համար, որ այն մի քիչ թույլ է բռնում կոկորդից:

«Ես կողմ եմ քվեարկում, քանի որ դիտում եմ որպես միջանկյալ քայլ: Վերջնական քայլն արագաչափերի իսպառ արմատախիլ անելն է ՀՀ-ի ավտոճանապարհներից»,- եզրափակեց Փաշինյանը:

Զարուհի Փաստանջյանն էլ կոչ արեց վարորդներին անհնազանդություն ցուցաբերել և գործադուլ անել, քանի որ այն ինչ արվում է նրանց նկատմամբ, դա Փոստանջյանի խոսքով ուղղակի թալան է, որը գնում է Սաշիկ Սարգսյանի գրպանը:
Գալուստ Սահակյանը նկատեց, որ Փոստանջյանը դեռ 20 վայրկյան ժամանակ ունի և կարող է շարունակել իր խոսք, սակայն վերջինս չցանկացավ որևէ բան ավելացնել:

«Դե ուրեմն շնորհավոր նոր տարի»,- ասաց Գալուստ Սահակյանը` նախագիծը դնելով քվեարկության: Այն ընդունվեց ձայների գերակշռող մեծամասնությամբ:
«Շնորհակալություն և ցտեսություն»,- ԱԺ նիստը փակեց Գալուստ Սահակյանը: