Ապրիլյան և Արցախյան 44-օրյա պատերազմի մասնակից, հերոս մայորին մեղադրանք է առաջադրվել․ նրան սպառնում է 4-8 տարվա ազատազրկում․ ահազանգ

Արցախյան 44-օրյա պատերազմից հետո տարբեր ձևաչափով ու «տրամաչափով» ճնշումների և քրեական հետապնդումների են ենթարկվում հերոսներ ու հրամանատարներ, ովքեր աչքի են ընկել ըմբոստությամբ ու իրենց մարտական հետագծով։

NEWSPRESS.am-ի տեղեկություններով՝ այդպիսի մի պատմության մեջ էլ հայտնվել է Ապրիլյան և Արցախյան 44-օրյա պատերազմի մասնակից մայոր Արամո Եգանյանը։

Հարուցված է քրեական գործ, Եգանյանին մեղադրանք է առաջադրված, որով մայորին սպառնում է 4-8 տարի ազատազրկում։

Մեր տեղեկություններով՝ դեպքը, որի առնչությամբ հարուցվել է քրգործը, տեղի է ունեցել այս տարվա՝ 2021 թվականի գարնանը։

NEWSPRESS.am-ը փորձել է պարզել դեպքի հանգամանքները և իմացել, որ պայմանագրային զինծառայող, շարքային Աշոտ Շահբազյանը մայոր Արամո Եգանյանին խնդրել է կարճ ժամանակով գնալ տուն և վերադառնալ՝ ասելով, որ տանը կարևոր գործեր կան։

Մայոր Եգանյանը թույլ է տվել նրան լքել զորամասը՝ արագ վերադառնալու պայմանով։ Ավելի քան 2 ժամ անց շարքային Շահբազյանը ծառայության վայր է վերադարձել միայն մի քանի զանգից հետո։

Շարքային զինծառայողը զորամաս է վերադարձել ոչ սթափ վիճակով․ նա ագրեսիվ պահվածք է ցուցաբերել և հերթապահի հետ վիճաբանության մեջ մտել, անգամ փորձել հարվածել նրան։

Գործը հասել է քաշքշուկի, երբ նրանց ձայները լսելով, դուրս է եկել մայոր Եգանյանը։ Նա փորձել է կանոնակարգել իրավիճակն ու հասկանալ, թե ինչ է տեղի ունեցել, սակայն շարքային Շահբազյանը շարունակել է ագրեսիվ պահվածք դրսևորել։

Այս անգամ զինծառայողը հարձակվել է արդեն մայորի վրա ու փորձել է նրան հարվածել։ Ինքնապաշտպանվելու և սպայի պատիվը պահելու համար՝ մայոր Եգանյանը հարվածել է է Շահբազյանին՝ պատճառելով նրան թեթև մարմնական վնասվածք, որի վերաբերյալ կա դատաբժշկական եզրակացություն։

Մասնավորապես, եզրակացությունում նշվել է, որ որևէ առողջական խնդիր Շահբազյանը չունի, իսկ վնասվածքը գնահատվել է թեթև։

Այս դեպքի առնչությամբ էլ հարուցվել է քրգործ և ուղարկվել դատարան։ Դատական առաջին նիստի օրը դեռ որոշված չէ․․․

Հատկանշական է, որ անտեսվել է շարքային զինծառայողի կողմից կանոնակարգը խախտելու փաստը և այն, որ ըստ էության, կադրային սպան՝ մայորի ուսադիրներով, 3 անգամ փորձել է պայմանագրայինին ցույց տալ իր տեղը, իսկ վերջինս հարձակվել և փորձել է հարվածել․․․

Զավեշտալին և նաև ողբերգությունն այն է, որ վերոհիշյալ դեպքից անմիջապես հետո, Աշոտ Շահբազյանը տեղափոխվել է բանակի հատուկ նշանակության զորքեր և անհոգ ծառայում է․․․

Որպեսզի շատերը պատկերացում կազմեն, թե ով է Արամո Եգանյանը,

NEWSPRESS.am-ը ներկայացնում է

վերջինիս  ծառայողական կենսագրությունը

Ծնվել է 1992 թ. մայիսի 5-ին քաղաք Երևանում։

Նախնական կրթությունը նախ ստացել է ՌԴ քաղաք Բառնաուլում, այնուհետև տեղափոխվել է Արցախ և ավարտել Ճարտարի միջնակարգ դպրոցը։

2009 թ.-ին ընդունվել և 2013 թ.-ին ավարտել է՝ ՀՀ ՊՆ մարշալ Արմենակ Խանփերյանցի անվան ռազմական ավիացիոն ինստիտուտի ՀՕՊ բաժինը։

2016 թ-ին ընդունվել և 2018 թ.-ին կարմիր դիպլոմով ավարտել է իրավագիտության մագիստրատուրան։

«Քայլելով կյանքի ճանապարհով» ժողովածուի հեղինակն է։

2009 թ.-ից ծառայում է ԶՈւ-ում։

2013 թ.-ից մինչ օրս, որպես կադրային սպա, ծառայում է ՊԲ-ում։

Ապրիլյան քառօրյա պատերազմում մարտական խնդրի հաջող կատարման համար (խոցել է 2 ԱԹՍ) պարգևատրվել է՝ «Արիության համար» մեդալով։

Արցախյան 44-օրյա պատերազմում ակտիվ մասնակցելու և մոտ 30 օդային նշանակետեր ոչնչացնելու համար, պարգևատրվել է՝ «Մարտական ծառայություն» և «Մարտական խաչ 1-ին աստիճանի» շքանշանով։

Արցախյան 44-օրյա պատերազմի ժամանակ 2 անգամ խոցվել է օդային նշանակետերի կողմից, իսկ Հադրութում 3 օր ընկել է շրջափակման մեջ, սակայն կարողացել է անձնակազմն ու իր սպառազինությունն անվնաս դուրս հանել շրջափակումից։

NEWSPRESS.am-ը փորձեց պարզել և ներկայացնել 

պայմանագրային զինծառայող, շարքային Աշոտ Շահբազյանի ծառայողական կենսագրությունը ևս:

• Աշոտ Շահբազյանը ծառայողական կենսագրություն չունի