Ձեր լրատվամիջոցը հատել է կարմիր գիծը. ՔՊ-ականները խուսափեցին սահմանի հետ կապված հարցի պատասխանից (տեսանյութ)

ԱԺ-ում ճեպազրույցի ժամանակ Yerevan.Today-ի լրագրողը «Քաղաքացիական պայմանագիր» խմբակցության պատգամավորներից հետաքրքրվեց, թե՝ այն դեպքում, երբ ՀՀ իշխանությունները հայտարարում են Ադրբեջանից սպասվող դրական ազդակների մասին, խմբագրությունը գրեթե ամեն օր զանգեր է ստանում Գորիսից, որ Կապան-Գորիս ավտոճանապարհին, երբ ստիպված են լինում անցնել ադրբեջանցիների կողքով, ադրբեջանցիները հայհոյում, սպառնում և քարերով հարվածում են մեր հայրենակիցների մեքենաներին։ Նման իրավիճակում Ադրբեջանից ազդակներն ինչպիսի՞ն պետք է լինեն, իշխանությունը կոնկրետ ի՞նչ ազդակների է սպասում։

Հարց տալու ամբողջ ընթացքում ՔՊ-ական պատգամավորներ Արթուր Հովհաննիսյանն ու Անդրանիկ Քոչարյանը փսփսում էին, հավանաբար՝ ինչպես արձագանքեն, որից հետո Արթուր Հովաննիսյանը հարցին պատասխանելու փոխարեն ասաց․ «Երևան Թուդեյ լրատվականը կարմիր գծերը հատել է, ուստի՝ հաջորդ հարցը»։

Չի բացառվում, որ այդ կերպ իշխանական պատգամավորները նաև փորձեցին խուսափել սահմանային խնդրին առնչվող հարցի պատասխանից: Սակայն, ի դժբախռություն նրանց, նույն հարցը կրկնեց նաև «Երկիր մեդիա» հեռուստաընկերության լրագրողը, նախապես ճշտելով, թե իշխանական պատգամավորները պատասխանո՞ւմ են արդյոք «Երկիր մեդիա»-ի հարցին:

Անդրանիկ Քոչարյանը թեև պատասխան հնչեցրեց, սակայն այն ըստ էության խոստոնավնեց նաև, որ Yerevan.Today-ի լրագրողի հնչեցրած հարցի տիրույթում  խնդիրներ կան:

«Դրական ազդակներ նախ պետք է ակնկալենք մեր իշխանություններից, և, բնականաբար, գիտեք, որ գնում է բանակցային գործընթաց, և ունենք խնդիր՝ նաև ձեր գործընկերոջ հնչեցրած հարցի տիրույթում, այսինքն՝ սահմանային այդ հատվածում, և շատ լավ գիտեք, որ շրջանցող ճանապարհի աշխատանքները կավարտվեն նոյեմբերի վերջին, և մենք այդ խնդիրը կլուծենք ու կանցնենք արդեն այն հիմնական խնդրին, որի մասին Դուք հնչեցրեցիք՝ սահմանազատման և սահմանագծման մասին։ Առանց դրա մենք առաջ չենք գնա՝ սահմանային մեր կահավորանքը ինչպիսին պետք է լինի և սահմանն ինչ ձևաչափով պետք է պայմանավորված լինի»։

Մանրամասները՝ տեսանյութում։