Հայաստանը պատրաստ է Ադրբեջանի հետ սահմանագծման ու սահմանազատման գործընթացին և սպասում է դրական ազդակի. Արմեն Գրիգորյան

«Մենք հայտարարել ենք, որ պատրաստ ենք սահմանազատման և սահմանագծման գործընթաց սկսել»: Այս մասին կառավարության նիստից հետո լրագրողների հետ զրույցում ասաց ԱԽ քարտուղար Արմեն Գրիգորյանը՝ անդրադառնալով սպասվող նոր եռակողմ փաստաթղթի ստորագրմանը։

«Մենք հայտարարել ենք, որ պատրաստ ենք դեմարկացիայի և դելիմիտացիայի գործընթաց սկսել, այդ մասով սպասում ենք դրական ազդակի Ադրբեջանից: Նաև պատրաստ ենք այդ աշխատանքային խմբի բոլոր առաջարկությունները, որոնք եղել են, սկսենք կոնկրետ հարցեր քննարկելուց»,-ասացԱրմեն Գրիգորյանը:

Գրիգորյանը նշեց, որ Երևանի մոտեցումն այն է, որ ՀՀ և Ադրբեջանական ԶՈՒ-երը տեղակաման վայրից հետ քաշվեն հայելային եղանակով, այդ տարածքներում տեղակայվեն ՀՀ և Ադրբեջանի սահմանապահ զորքերը և սկսեն սահամնազատման և սահմանագծման գործընթացը։ Փաստինֆոն հայտնւմ է, որ ըստ Գրիգորյանի՝ մինչև նոյեմբերի 10-ը որևիցե այդպիսի բան չի նախատեսվում, բայց հայտարարել են պատրաստակամությունը այդ աշխատանքները սկսելու հարցում։

Ըստ Գրիգորյանի՝ այդ տեղեկությունը հանրության շրջանում աժիոտաժ սկսելու և ընդդիմությանը աջակցելու համար է։ ԱԽ քարտուղարը նշեց նաև, որ Հայաստանի համար սահամանազատման և սահմանագծման համար խանգարող հանգամանք չկա՝ պատրաստ են սկսել գործընթացներն ու Ադրբեջանից սպասում են դրական ազդակի։ Գրիգորյանը՝ անդրադառնալով նախապայմաններին, նշեց, որ չգիտի՝ ի՞նչն է խանգարում Ադրբեջանին կսել գործընթացը։

ԱԽ քարտուղար անդրադարձել է նաև սահմանազատման և սահմանագծման գործընթացի հիմք հանդիսացող քարտեզներին, որոնք ըստ Վլադիմիր Պուտինի, պահվում են ՌԴ ԳՇ-ում։

«Խորհրդային միության տարիներին սահմանազատման առաջին գործընթացը հենց 20-ականներին՝ 26-27-ին է սկսվել, որն ավարտվել է 29-ին։ Դրանից հետո ձևավորված քարտեզների հիմքը եղել է հենց այդ թվականների քարտեզները։ Շրջանառության մասին խոսք չկա։ Աշխատանքային խումբը քննարկում է, թե ինչպե՞ս սկսել գործընթացը, ո՞րը հիմք ընդունել»։

ԱԽ քարտուղարը հայտարարեց, որ այս պահին հստակություն չկա, քննարկումներ են ընթանում ու եթե տեղեկություններ լինեն՝ կհայտարարեն։ Գրիգորյանը մանրամասնեց, որ քարտեզների միջև տարբերություն կա։

«Միակ իրավական հիմքով քարտեզը 20-ականների քարտեզն է՝ մի մասը նշում է 1926, մյուսը՝ 1929 թվականների քարտեզների մասին։ Հարցում միասնական մոտեցում չկա, բայց հիմնական քարտեզը դա է»,- ասաց Գրիգորյանը։