«Արդյո՞ք Մոսկվայում ամեն ինչ այնքան վատ է անցել, որ խոսելու ոչինչ չկա». Աննա Մկրտչյանի հարցն անպատասխան մնաց (տեսանյութ)

Հարգելի հայրենակիցներ, վստահ եմ՝ կհիշեք, որ վարչապետի աշխատասենյակը զբաղեցնող անձը ոչ վաղ անցյալում ցանկացած հանդիպում մեր օտարերյա գործընկերների հետ որակում էր որպես աննախադեպ և ցանկացած քննարկում որակում էր որպես փայլուն հարաբերությունների միակ առհավատչյան։ Այս մասին Ազգային ժողովում կառավարության հետ հարցուպատասխանի ժամանակ ասաց ԱԺ «Պատիվ ունեմ» խմբակցության պատգամավոր Աննա Մկրտչյանը։ 

«Արդեն բավական ժամանակ է ոչ աննախադեպության, ոչ էլ փայլուն հարաբերությունների մասին անգամ մեկնաբանություններ չի անում։ Վերջերս հանդիպում տեղի ունեցավ ՌԴ նախագահ Պուտինի հետ, բայց այդ հանդիպումից հետո այդ անձնավորությունը ոչ աննախադեպ գրառում արեց՝ իր սովորության համաձայն, ոչ էլ ինչ-որ փայլող ուղիղ եթեր կազմակերպեց։ Հիմա հարցս՝ ուզում եմ հասկանալ՝ արդյո՞ք Մոսկվայում ամեն ինչ այնքան վատ է անցել, որ խոսելու ոչինչ չկա դրա մասին կամ արդյո՞ք այնպիսի բան է խոստացել, որը անգամ մանիպուլյատիվ իրականության մեջ, իր սովորության համաձայն, ներկայացնելու հնարավորություն չի տալիս և միանգամից ուզում եմ ասել, որ այս ամբիոնին չմոտենալն էլ ավելի խոսուն ու փայլուն պատասխան կլինի»,- ասաց Մկրտչյանը։ 

ԱԺ նախագահ Ալեն Սիմոնյանն էլ ասաց․ «Հարցին կպատասխանի․․․ չէ՞»։ Հասկանալով, որ կառավարությունից որևէ մեկը չի պատասխանում հարցին, նա դիմեց ընդդիմադիր պատգամավորին, թե ում էր ուղղված հարցը։

Մկրտչյանի պատասխանը չլսվեց, և նրա հարցը, փաստորեն, մնաց անպատասխան։ 

Մանրամասները՝ տեսանյութում