Եթե Վազգեն Սարգսյանն ու Կարեն Դեմիրճյանը կենդանի լինեին, մենք այսօր ուրիշ պետություն կունենայինք. պարտություն չէր լինի. ԵԿՄ նախագահ (տեսանյութ)

Բոլորս ու հատկապես Երկրապահ կամավորների միությունը պահանջատեր է, որպեսզի Հոկտեմբերի 27-ի ոճրագործությունը բացահայտվի: Այս մասին հայտարարեց ԵԿՄ նախագահ Սասուն Միքայելյանը՝ «Եռաբլուր» զինվորական պանթեոնում լրագրողների հետ զրույցում:

Թե ինչու մինչև հիմա ոչ մի իշխանության չի հաջողվել բացահայտել արդեն 22 տարի վաղեմություն ունեցող ոճիրը, ԵԿՄ նախագահը չի մեկնաբանում, սակայն հույս է հայտնում, որ գործող իշխանությանը, որն արդեն 3 տարի է, ինչ կառավարում է, կհաջողվի բացահայտել:

«Ամեն ինչն իր ժամանակն ունի»,- ասաց Սասուն Միքայելյանը:

Ինչ վերաբերում է ԱԺ նախկին նախագահ Կարեն Դեմիրճյանի ու նախկին վարչապետ Վազգեն Սարգսյանի գործունեությանը, ապա ԵԿՄ նախագահը վստահեցնում է, որ եթե նրանք ողջ լինեին՝ Հայաստանը պարտություն չէր ունենա:

Նա նկատում է, որ հոկտեմբերի 27-ի ոճրագործության հիմքում էլ դարձյալ Արցախի հարցն էր:

«Գլխատվեցին ամբողջ օրենսդիր և գործադիր մարմինները մեր պետության վերելքի ժամանակաշրջանում: Եթե Վազգեն Սարգսյանն ու Կարեն Դեմիրճյանը կենդանի լինեին, մենք այսօր ուրիշ պետություն կունենայինք: Հզոր բանակ կունենայինք, և սա չէր լինի: Երբ Վազգեն Սարգսյանը և մյուսները գնդակահարվեցին, մեր պետությունը հիմքից քանդվեց»,- ասաց Սասուն Միքայելյանը՝ ընդգծելով, որ սա իր անձնական տեսակետն է և միևնույն ժամանակ նշելով, որ ոճրագործության բացահայտման պահանջատերը բոլորն են: