«Համաձա՞յն եք, որ Արցախն ուրացողը դավաճան է, պարո՛ն Ռուբինյան». «Միանում եմ ձեր արձանագրմանը, պարո՛ն Մանուկյան». Ռուբինյանի արձագանքը՝ Մանուկյանին (տեսանյութ)

Ես շատ կցանկանայի եզրափակվել այսօրվա օրակարգի հարցով, բայց երեկվա խայտառակ միջադեպի հետ կապված ուզում եմ պարոն Ռուբինյանին ու մյուս ներկաներին որոշակի ինֆորմացիա տալ:

Այս մասին ԱԺ ամբիոնից իր ելույթի ժամանակ ասաց «Պատիվ ունեմ» խմբակցության քարտուղար Հայկ Մամիջանյանը՝ անդրադառնալով երեկ՝ հոկտեմբերի 26-ին,  խորհրդարանում տեղի ունեցած միջադեպին, երբ «Հայաստան» խմբակցության պատգամավոր Գեղամ Մանուկյանին հեռացրեցին դահլիճից:

Նա նախ անդրադարձավ ՔՊ-ական պատգամավոր Վիգեն Խաչատրյանի ելույթին, որի ժամանակ վերջինս վիրավորեց խորհրդարանական ընդդիմությանը՝ նրանց արարքը որակելով ստորություն: Խաչատրյանը նաև կասկածի տակ էր դրել Հայկ Մամիջանյանի ելույթը:

Մամիջանյանը նկատեց, որ ինքը՝ որպես ԱԺ պատգամավոր, կարող է իր ելույթի ժամանակ ցանկացած հայտարարություն անել: Ինչ վերաբերում է նիստը վարող ԱԺ փոխխոսնակ Ռուբեն Ռուբինյանին, ապա Մամիջանյանը նրան ևս խորհուրդ ուներ:

«Բոլոր ներկաների և նաև պարոն Ռուբինյանի համար, որ այդպես անձնազոհաբար պատրաստ էր անգամ անվտանգության աշխատակիցների միջամտությամբ պաշտպանել Խաչատրյանի պատիվը, թեև Գեղամ Մանուկյանի խոսքի հետ կապված կարծում եմ՝ ոչ մի խնդիր չկա՝ Արցախն ուրացողը չի կարող դավաճան չանվանվել, ուղղակի ուզում եմ մեջբերել Վիգեն Խաչատրյանի հարցազրույցից հատված՝ «Իշխող քաղաքական ուժը դեռևս չունի անհրաժեշտ հասունություն». այ սա է Խաչատրյանի կարծիքը ձեր մասին, հարգելի գործընկերներ և այդ անձին դուք երեկ անվտանգության միջամտությամբ պաշտպանում էիք»,- ասաց Մամիջանյանը:

Ռուբեն Ռուբինյանն էլ նկատեց, որ ցանկացած պատգամավոր իր դիրքորոշումը կարող է հայտնել, բայց ոչ մի պատգամավոր մյուսին վիրավորելու իրավունք չունի:

Նա նկատեց, որ անվտանգության աշխատակիցներին ներս է հրավիրել այն բանից հետո, երբ վիրավորանքներ է հնչել:

«Քննադատությունները պետք է լինեն բովանդակալից»,- ասաց Ռուբինյանը:

Գեղամ Մանուկյանն էլ տեղից հարց ուղղեց նիստը վարողին. «Բայց համաձա՞յն եք, որ Արցախն ուրացողը դավաճան է, պարոն Ռուբինյան», ինչին արձագանքելով՝ վերջինս ասավ. «Միանում եմ ձեր արձանագրմանը, պարոն Մանուկյան»:

Մանրամասները՝ տեսանյութում