Ամանորյա տոներին պետք է աշխատել, որ հարուստ ու հաջողակ լինեք. Քերոբյանը գրքից մեջբերում արեց

Էկոնոմիկայի նախարար Վահան Քերոբյանն այսօր` հոկտեմբերի 26֊ին, Ազգային ժողովում անդրադառնալով ամանորյա տոներն աշխատանքային օր դարձնելու կառավարության որոշմանը, հայտարարեց, որ տոները կրճատելու մասին իրենց ներկայացրած նախագիծը զուտ տեխնիկական կամ տնտեսական նախագիծ չէ, այն քաղաքակրթական նախագիծ է:

Մինչ բուն նախագծին անդրադառնալը, Քերոբյանը բոլորին հիշեցրեց, որ ինքը մասնակցել է Արցախյան 44֊օրյա պատերազմին, որի ժամանակ իր հետ տարել է մի գիրք` «Յուրահատուկները. հաջողության պատմությունը» գիրքը:

«Այստեղ պատմություն է այն մասին, թե ինչքան կարևոր նշանակություն է ունեցել Բիլ Գեյթսի, Սթիվ Ջոբսի հաջողության համար այն, որ իրենք ծնվել են 1955 թվականին: Այս գրքի ամեն տողում գրված է անխոնջ աշխատանքի մասին որպես հաջողության հասնելու միակ ձև»,-ասաց նա:

Նա իր ելույթը սահմանափակեց հենց այդ գրքից մեջբերում անելով։

«Ազգային ժողովը պետք է ազդարարի աշխատանքի՝ որպես հաջողության հասնելու միակ հնարավոր ճանապարհի մասին: Խոսքերս ուզում եմ ավարտել «Յուրահատուկները. հաջողության պատմությունը» գրքի կարմիր թելը հանդիսացող չինական ասացվածքով՝ «Չկա մեկը, ով տարվա մեջ 360 օր անցնում է աշխատանքի արևածագից առաջ ու չի դարձնում իր ընտանիքը հարուստ»: Պետք է անցնենք աշխատանքի»,-նշեց նախարարը:

Հիշեցնենք՝ սեպտեմբերի 16-ի Կառավարության նիստում որոշում է ընդունվել «ՀՀ տոների և հիշատակի օրերի մասին» օրենքում փոփոխություններ կատարելու մասին։

Ըստ դրա՝ Ամանորի և Ծննդյան տոները նշվում են դեկտեմբերի 31-ից հունվարի 1-ը ներառյալ (Ամանոր) և հունվարի 6-ը (Սուրբ Ծնունդ և Հայտնություն)։ Այդ օրերը ոչ աշխատանքային կլինեն։

Իսկ հունվարի 2-ը, 3-ը, 4-ը, 5-ը և 7-ը աշխատանքային օրեր են սահմանվում։