Ասել են՝ ով որտեղ կանգնած է, պետք է մնան այնտեղ, բայց հիմա այդ հատվածներում ադրբեջանական ուժեր են. Արթուր Սարգսյան

ԱԺ «Հայաստան» խմբակցության պատգամավոր, Սիսիանի նախկին քաղաքապետ Արթուր Սարգսյանը, ով կալանքից վերջերս է ազատ արձակվել և ստանձնել պատգամավորի իր լիազորությունները, տեղեկացնում է, որ թուրքը որիսի, Խնձորեսկի դիրքերից և Զանգեզուր-Կուբաթլուից լրիվ հետ են եկել այսօրվա այն դիրքերը, որտեղ մերոնք հիմա կանգնած են, ինչը նոյեմբերի 9-ի պայմանագրի մեջ նշված չի եղել:

«Բոլորդ էլ գիտեք, որ ասել են՝ ով որտեղ կանգնած է, պետք է մնան այնտեղ. հիմա այդ հատվածներում ադրբեջանական ուժեր են», - լրագրողների հետ զրույցում հայտարարեց Արթուր Սարգսյանը։

Նա պատմեց նաև, թե դեկտեմբերի 17-ին ՊՆ Վաղարշակ Հարությունյանը գնացել է Գորիս և հայտարարել համայնքի ղեկավարներին, որ մինչև հաջորդ օրը` դեկտեմբերի 18֊ը, ժամը 5-ը բոլորիդ ժամանակ՝ պետք է հետ քաշվեն:

«Մեզ մոտ մտահոգություն առաջացավ, քանի որ այն ժամանակ բոլոր բարձրաստիճան պաշտոնյաներն ասել էին, որ ով որտեղ կանգնած է, պետք է մնա այդտեղ։ Երկրորդը՝ նոյեմբերի 9-ի հայտարարության մեջ ոչ մի տեղ նշված չէ, որ պետք է հետ քաշվեինք։ Նախարարին ինչ հարցնում էինք, ասում էր՝ ես տեղյակ չեմ, վաղը ժամը 5-ին բոլորդ պետք է հետ գաք։ Այդտեղից են առաջացել մեր մտահոգությունները։ Ես էլ այնտեղ հարց եմ տվել, ասել եմ՝ պարոն նախարար, եթե դուք չեք իմանում, կարո՞ղ է մեկ ամիս հետո գաք, մեզ հավաքեք, ասեք՝ Սիսիանն էլ է տված թուրքերին, հետ գնացեք», - մանրամասնեց Սարգսյանը։

Նրա խոսքով՝ այդ հրահանգից հետո հայկական կողմը 25 կմ հետ է քաշվել՝ Գորիսի և Կապանի հատվածում։

Արթուր Սարգսյանի խոսքով, այս պահին թուրքը գտնվում է Սիսիանի վարչական տարածքում, Սև լճից վերև՝ Իշխանասարի հատվածում:

«Մենք ասել ենք՝ այս խնդիրները պետք է լուծվեն, որ մայիսի 12-ից այս իրավիճակը չունենայինք, որ թուրքը քայլելով չգար, հասներ մեր հողի մեջ։ Եթե այդ խնդիրները ժամանակին` նոյեմբերի 9-ից հետո լուծած լինեին, ինչը մենք էինք պահանջում, մայիսի 12-ին թուրքը չէր գա, նստի մեր հողի մեջ և մինչև այսօր նստած է», - ասաց Արթուր Սարգսյանը։

Նա ընդգծեց, որ համայնքի ղեկավարների նկատմամբ հետապնդումներն սկսեցին այն պահից, երբ նրանք սկսեցին բարձրաձայնել Սյունիքին սպառնացող վտանգների մասին: