Հարազատներն ու մերձավորները վերջին հրաժեշտն են տալիս Տիգրան Կարապետյանին (լուսանկարներ)

Երևանի Նոր Նորքի 5-րդ զանգվածի Սբ. Սարգիս եկեղեցում այս րոպեներին վերջին հրաժեշտն են տալիս հայ հասարակական-քաղաքական գործիչ, բանաստեղծ, ԱԼՄ Հոլդինգի հիմնադիր նախագահ, «Ժողովրդական» կուսակցության նախագահ Տիգրան Կարապետյանին:

Հրաժեշտի արարողությունը նախատեսված է այսօր՝ հոկտեմբերի 25-ին, ժամը 11:30-14:00-ը: Ժամը 14:00-ին տեղի կունենա ԱԼՄ Հոլդինգի հիմնադիր նախագահի հուղարկավորությունը: Նրա մարմինը կամփոփվի Երևանի Թոխմախի գերեզմանատանը:

NEWSPRESS.am-ի անձնակազմը ցավակցում է Տիգրան Կարապետյանի հարազատներին ու մտերիմներին՝ նրա կորստի համար:

Կենսագրություն

2001 թ. Կարապետյանը հիմնադրեց ԱԼՄ մեդիա հոլդինգը։ Հեռուստալիքով ցուցադրվում էին համերգներ, որտեղ կարող էին մասնակցել գրեթե բոլոր ցանկացողները, ինչպես նաև Կարապետյանի բարեգործական ակցիաները։ Կարապետյանը ուներ նաև ծրագրեր, որտեղ նա վերլուծում էր քաղաքական իրադարձությունները ժողովրդի լայն զանգվածներին հասկանալի լեզվով։

2010 դեկտեմբերին ընդունվեց որոշում ԱԼՄ-ի փակելու մասին։ Կարապետյանը եթերում հայտարարեց, որ դա քաղաքական որոշում է և կոչ արեց պայքարել այդ անարդարության դեմ։ 2011 թ. հունվարի 7-ից Երևանում, Գյումրիում, Վանաձորում տեղի ունեցան հանրահավաքներ։

Հունվարի 19-ին Մատենադարանի մոտ տեղի ունեցավ բազմահազարանոց հանրահավաք, որտեղ նա հայ ժողովրդի անունից 15 կետերից պահանջ ներկայացրեց իշխանություններին։

Հունվարի 20-ին եթեր հեռարձակվեց ԱԼՄ-ի վերջին հաղորդումը.

Տիգրան Կարապետյանը մահացել է քաղցկեղից՝ 2021 թվականի հոկտեմբերի 21-ին Երևանում: