ՀՀ քաղաքացիները ՌԴ-ում 30 օր ազատ են գրանցման պարտավորությունից

2014թ-ի մայիսից, երբ Հայաստանը միացավ Եվրասիական տնտեսական միության պայմանագրին, հատկապես Ռուսաստանի Դաշնությունում աշխատողների համար որոշակի արտոնություններ սահմանվեցին, այդ թվում աշխատանքային ազատ ռեսուրսների տեղաշարժ:
Հատկապես ի՞նչ պետք է անեն ՌԴ-ում աշխատանք փնտրող ՀՀ քաղաքացիները, ՀՀ ՏԿԱԻՆ Միգրացիոն պետական ծառայության պետի տեղակալ Իրինա Դավթյանը newspress.am-ին պարզաբանեց, որ ՌԴ մուտք գործելիս անհրաժեշտ է լրացնել միգրացիոն քարտ և այցի նպատակը բաժնում նշել աշխատանք բառը: Աշխատանքային միգրանտի ընտանիքի անդամները նույնպես պետք է լրացնեն միգրացիոն քարտ:

Նա նաև նշեց, որ աշխատանքի տեղավորվելու նպատակներով այլ անդամ պետության տարածք ժամանած ԵԱՏՄ անդամ պետության քաղաքացիները և նրանց ընտանիքների անդամները մուտք գործելու օրվանից սկսած 30 օրվա ընթացքում ազատվում են գրանցման, հաշվառման կանգնելու պարտավորությունից և կարող են միգրացիոն քարտ չլրացնել, սակայն ՌԴ մուտք գործելուց 90 օրվա ընթացքում ՀՀ քաղաքացին պետք է կամ աշխատանքային, կամ քաղաքացիաիրավական պայմանագիր ունենա:

Ի. Դավթյանը նաև շեշտեց, որ ԵԱՏՄ անդամ պետության աշխատողները, այլ երկրում տեղավորվելով աշխատանքի, նրանց ընտանիքի անդամները իրավունք ունեն հաճախելու նախադպրոցական հաստատություններ, ստանալու կրթություն և այլն:

Մասնավորապես, անդրադառնալով այն խնդրին, որ հաճախ հայ միգրանտների ընտանիքի անդամներին ՌԴ-ում չեն պահում և հետ են ուղարկում, Ի. Դավթյանը պարզաբանեց, որ աշխատանքային միգրանտի ընտանիքի անդամի դեպքում գործում են նույն կանոնները, պարզապես հավելյալ պետք է միգրացիոն տարածքային ծառայություն ներկայացվի աշխատանքային միգրանտի հետ ընտանիքի անդամի ազգակցական կապի աստիճանը վկայող փաստաթղթեր:

«Հայ աշխատանքային միգրանտը, նրա ընտանիքի անդամները պետք է լքեն Ռուսաստանի Դաշնությունը, եթե ավարտվել է այդ երկրում գտնվելու ժամկետը, հակառակ դեպքում նրանց նկատմամբ կկիրառվի մուտքի արգելք»,- ասաց նա: