Միայն հանրային ճնշումն է ունակ այս իշխանություններին վերադարձնել իրականություն. «Հայաստան» խմբակցության պատգամավոր (տեսանյութ)

Իշխանությունը փորձում է ընդդիմության հաղթանակը վերագրել ժողովրդավարությանը, թե իբր իրենք այնքան ժողովրդավար են, որ արդար ընտրություն եղավ, և ընդդիմությունը հաղթանակ գրանցեց, սակայն այդպես չէ:

Այս մասին այսօր մամուլի ասուլիսի ժամանակ ասաց ԱԺ «Հայաստան» խմբակցության պատգամավոր Քրիստինե Վարդանյանը՝ անդրադառնալով ՏԻՄ ընտրություններին:

Նա նկատեց, որ Հայաստանում ոչ միայն չկա ժողովրդավարություն, այլև իշխանությունը մեծ թռիչքներով հետ է նահանջում ժողովրդավարությունից:

«Գորիսում տեղի ունեցած ընտրությունները պետք է առանձնացնել մյուսներից, քանի որ մարդիկ իրենց քվեով պատասխանել են այն մեղադրանքներին, որոնք ներկայացված էին Առուշ Առուշանյանին»,- ասաց պատգամավորը:

Նրա դիտարկմամբ, Հայաստանում չկա «Քաղաքացիական պայմանագիր» ուժ, Հայաստանում կա Նիկոլ Փաշինյան, ով մարդկանց ինչ-որ քանակի դեռ կարողանում է խաբել, սակայն ամեն անգամ ավելի քիչ թվով մարդկանց, նաև գիտեն, որ խաբելու գործընթացն անվերջ չեն կարողանալու տանել։

Անդրադառնալով երկրի անվտանգության հարցին՝ պատգամավորը նկատեց, որ այն օրակարգային է:

«Երբ ասում ենք՝ հայրենիքը վտանգի մեջ է, հայրենիքը պետք է փրկել, անձնական բաները մի քիչ կողք են դրվում»,- ասաց Վարդանյանը։

Ընդդիմադիր խմբակցության ներկայացուցիչը նկատում է, որ միայն  հանրային ճնշումն է ունակ այս իշխանություններին վերադարձնել իրականություն և ի վերջո լուծել այս իշխանության հարցը։

«Խնդիրն այդ հանրային ճնշումի ճիշտ կազմակերպումն է, այնպես չարվի, որ այդ հանրային ճնշումը մսխվի կամ որևէ այլ տեղ գնա, քանի որ հիասթափության նոր ալիքին մարդիկ էլ չեն դիմանա։

Իհարկե, հիմա կա հիասթափություն, մարդիկ վստահել են մեզ, ձայն են տվել մի հույսով, որ այս իշխանությունը օր առաջ կգնա։ Մեզ տված ձայնը իրականում մեկ պատգամ ունի՝ իշխանափոխություն։ Դա տեղի չի ունեցել, որը ցանկալի էր անել, բայց հնարավոր չի եղել կազմակերպել։ Արձանագրենք, որ այս ընթացքում չհասանք այնտեղ, ուր պետք էր հասնել, պետք է պայքարը շարունակել»,- ասաց Քրիստինե Վարդանյանը։