Աննա Գրիգորյանի հարցերն էլ ոնց որ գիշերային վիկտորինայի հարցեր լինեն. Արմեն Խաչատրյան (տեսանյութ)

Պարո՛ն Նազարյան, պարո՛ն Աբրահամյան, ամբողջովին ընդունում եմ անվտանգության հետ կապված ձեր առաջ քաշած հարցերը, բայց դրանք չի կարելի քննարկել հանրային վայրերում, որովհետև դրանք մեր երկրի անվտանգության հետ են կապված։
Այս մասին այսօր՝ հոկտեմբերի 19-ին, ԱԺ պաշտպանության, ազգային անվտանգության հարցերի հանձնաժողովում հայտարարեց ՔՊ խմբակցության պատգամավոր Արմեն Խաչատրյանը` դիմելով  «Հայաստան» խմբակցությունից Գեղամ Նազարյանին և «Պատիվ ունեմ»-ից Տիգրան Աբրահամյանին:

«Ես հաճախ եմ Սյունիքում լինում, իսկ վերջին շրջանում մշտապես այնտեղ եմ լինում: Իմ դռները ձեր առջև բաց են, ցանկացած հարցով կարող եք գալ, իրար հետ
քննարկենք, եթե դա միտված է լինելու մեր անվտանգության մակարդակի բարձրացմանը: Ես այդ միտումը կոնկրետ ձեր երկուսի մոտ տեսնում եմ»,-ասաց Խաչատրյանը։

Նա անդրադարձավ նաև «Հայաստան» դաշինքի դիրքորոշմանը` հիշեցնելով, որ վերջիններս հայտարարում են, թե առաջնային խնդիրը երկրի պաշտպանությունն է, անվտանգության շահերի ապահովումը, մինչդեռ այսօր չեն մասնակցել երկրի անվտանգության համար կարևոր հարցերի քննարկմանը:

Նա անդրադարձավ նաև Աննա Գրիգորյանի բարձրացրած հարցերին։

«Իսկ Աննա Գրիգորյանի հարցերն էլ ոնց որ գիշերային վիկտորինայի հարցեր լինեն»,-ասաց նա:

ՔՊ-ականների որակմամբ՝ Աննա Գրիգորյանն այնպիսի բաներ է ասում, որ միայն հակառակորդ երկրի ղեկավարը կարող է ասել։

«Երբ տիկին Գրիգորյանը հարց է տալիս՝ մենք պետական սահման ունե՞նք, ինքը դրանով կասկածի տակ է դնում ՀՀ պետական սահմանը: Ես նման բառապաշար լսել եմ միայն մեր հակառակորդ երկրի ղեկավարից»,-ասաց Վիլեն Գաբրիելյանը: