Իշխանությունն ասում է՝ Արցախի հետ կապված հարցերով մեզ մի դիմեք. Տիգրան Աբրահամյան

Կամ՝ այս իշխանությունն արդեն պայմանավորվել է Շուշիի և Քաշաթաղի շրջանի հանձման շուրջ կամ հնարավորությունը չի տեսնում այնպիսի բանակցություններ վարելու, որի պայմաններում այդ բնակավայրերը չեն հանձնվի Ադրբեջանին:  Այս մասին լրագրողների հետ զրույցում ասաց ԱԺ «Պատիվ ունեմ» խմբակցության պատգամավոր, անվտանգության հարցերով փորձագետ Տիգրան Աբրահանյանը:

Նա ընդգծեց, որ Արցախում տեղակայված ռուսական խաղաղապահ զորախումբն ունի անվտանգություն ապահովելու գործառույթ, բայց դրան զուգահեռ կա պաշտպանության բանակ, որի արդիականացումն այսօր հրատապ է, մարտունակություն բարձրացմանն ուղղված հարցերն առաջանային են:

«Ցանկացած պարագայում Արցախի պաշտպանության բանակը, ՀՀ զինված ուժերը պետք է ունենան այնպիսի մակարդակ, որն առաջին հերթին կկանխի արյունահեղությունը, լայնամաշստաբ պատերազմն Արցախում, կկարողանա պատերազմի ժամանակ ապահովել Հայաստանում և Արցախում ապրող մեր հայրենակիցների անվտանգությունը»,- ասաց Աբրահամյանը:

Մինչդեռ այսօր, Տիգրան Աբրահամյանի դիտարկմամբ, իշխանությունը ձեռքերը լրացել է Արցախի խնդիրներից։

«Իշխանությունն ասում է՝ Արցախի հետ կապված հարցերով մեզ մի դիմեք, այսինքն նրանք իրենց ձեռքերն արդեն լվացել են և որևէ պատասխանատվություն, բացի հումանիտար բնույթի հարցերից, իրենց վրա չեն զգում»,- ասաց պատգամավորը: