Այս իշխանությունները պաշտպանվածության հնարավորություն չեն ստեղծում մեր քաղաքացիների համար. Տիգրան Աբրահամյան

Երեկվա սահմանային միջադեպն ինձ համար անսպասելի չէր նաև այն առումով, որ ոչ միայն քաղաքական իրավիճակն էր հուշում այդպիսի դրսևորումները՝ սահմանային տարբեր հատվածներում, այլև այն, որ հետպատերազմյա ժամանակահատվածում տարբեր տիպի սադրանքներ եղել են, ուղղակի շատ դեպքերում դրա հետ կապված պաշտոնական տեղեկատվություն չի փոխանցվել և այս հանգամանքներում այդ լուրը հանրության համար նորություն էր և անհանգստությունների տեղիք տվեց Հայաստանի և Արցախի Հանրապետությունում: Այս մասին լրագրողների հետ ճեպազրույցում ասաց ԱԺ «Պատիվ ունեմ» խմբակցության պատգամավոր Տիգրան Աբրահամյանը: 

«Իրականում նկատելի է, որ Ադրբեջանը սահմանային տարբեր ուղղություններում շարունակելու է սադրանքները, որը նրա համար ունի ճնշման հնարավորություն. ճնշում՝ Հայաստանի և Արցախի իշխանությունների վրա և մեր ռեգիոնում դրսևորվող առաջիկա գործընթացներում ստանալ իրենց համար շահեկան դիրքավորում: Բայց ունենք նաև երկրորդ տարբերակը՝ Ադրբեջանը մինչև 2018 թվականն իրականացրել է սադրանքներ, բայց այն ժամանակ հնարավորություները, կարողությունները և արտաքին առումով, և՛ դիվանագիտական առումով, և՛ ռազմական ներուժի առումով լրիվ եղել են այլ: Ներկայումս այս իշխանությունները պաշտպանվածության հնարավորություն չեն ստեղծում մեր քաղաքացիների  համար: Եվ դա է պատճառը, որ ցանկացած միջադեպ, որը մեկ ուրիշ պայմաններում կարող էր ունենալ այլ հետևանք, այդ թվում՝ վիրավորների թվի ոչ այս չափի ծավալ, մենք այս իրավիճակում ունենք լրիվ այլ՝ բավականին ողբերգական հետևանքներ»,- ասաց Աբրահամյանը: 

Ըստ պատգամավորի՝ ադրբեջանական սադրանքները վերջին շրջանում ավելի ակտիվ են, բայց հասարակության ուշադրությանն էր ներկայացվել երեկ երեկոյան միջադեպը:

«Նմանատիպ միջադեպերը շատ են, բայց մյուս դեպքերում կա՛մ վիրավորներ չենք ունեցել, կա՛մ եղել են մարմնական վնասվածքներ, որոնց մասին պաշտոնական հաղորդագրություն չի եղել»,- նկատեց Աբրահամյանը:

Նա անդրադարձավ նաև դիտարկմանը, թե որքանով էին այդ կրակոցներն ուղղված ռուս խաղաղապահներին: 

«Ռուսական կողմին կարող են լինել ուղերձներ, որոնք Ադրբեջանը կամ Թուրքիան՝ Ադրբեջանի միջոցով, ուղղում է Ռուսաստանին: Չստացվի այնպես, որ նույն այդ երկրները մեկ այլ իրվաիճակում ռազմական գործողություններ սկսեն՝ մեսիջներ հղելով այլ երկրներին: Այս իրավիճակում անհրաժեշտություն կա պետական կառավարման համակարգը պատրաստել իրավիճակային տարբեր զարգացումների համար, անվտանգային համակարգն անհրաժեշտ է ռեֆորմների ենթարկել, որպեսզի պատրաստ լինի իրավիճակային տարբեր սցենարների զարգացման պարագայում համարժեք ձևով գործել»,- ասաց պատգամավորը: