Կանենք մեզնից կախված ամեն ինչ՝ մեր տարածաշրջանում խաղաղության ու կայունության հաստատման համար․ Փաշինյան

«ՌԴ-ն և անձամբ Վլադիմիր Պուտինը էական դերակատարում ունեցան 44-օրյա պատերազմի դադարեցման գործում: Նրանք այսօր էլ առանցքային դերակատարում ունեն տարածաշրջանում խաղաղության պահպանման համար: Մենք շնորհակալություն ենք հայտնում այդ ջանքերի համար»։

Այս մասին հայտարարեց ՀՀ վարչապետ Նիկոլ Փաշինյանը ԱՊՀ պետությունների ղեկավարների խորհրդի նիստում։

Փաշինյանը հայտարարեց, որ պետք է քաղաքական կամք դրսևորել ու տարածաշրջանում փոխել առկա իրավիճակը՝ հասնելով իրական կայունության ու խաղաղության:

«Մենք պատրաստ ենք այդ փոփոխություններին: Ավելին, դա համընկնում է մեր տեսլականին: Կառավարության նպատակներից մեկն է նոր դարաշրջանի բացումը մեր երկրի և մեր տարածաշրջանի խաղաղ զարգացման համար»,- ասել է Փաշինյանը:

Նա նշել է, որ կան գործոններ, որոնք հարցականի տակ են դնում մեր տարածաշրջանում խաղաղության հասնելու գործընթացը: Չնայած քաղաքական բոլոր ջանքերին, և ի հեճուկս եռակողմ հայտարարությանը՝ մարդիկ շարունակում են զոհվել Լեռնային Ղարաբաղում և հայ-ադրբեջանական սահմանին։

«Շատերը ոչ միայն չեն հավատում, այլև չեն ցանկանում խաղաղություն ու կայունություն մեր երկրում, և այդ պայմաններում շատ դժվար է առաջ տանել խաղաղության օրակարգը: Սակայն մենք վճռական ենք տրամադրված և կանենք մեզնից կախված ամեն ինչ մեր տարածաշրջանում խաղաղության ու կայունության հաստատման համար: Մենք ունենք հստակ պատկերացում, թե ինչպես հասնենք այդ նպատակին. երկխոսություն և թշնամանքի մթնոլորտի աստիճանաբար հաղթահարում, որը, ցավալիորեն առկա է մեր տարածաշրջանում, տրանսպորտային և տնտեսական հաղորդակցությունների ապաշրջափակում: Ահա միակ ճանապարհն է, որը, մեր կարծիքով, կբերի այդ նպատակի իրականացմանը»,- ասել է Փաշինյանը:

Նա ասել է նաև, որ խախտելով նոյեմբերի 9-ին ձեռք բերված համաձայնության 8-րդ կետը՝ Ադրբեջանը չի վերադարձրել բոլոր գերիներին և պահվող անձանց: Բայց միևնույն ժամանակ հույս է հայտնել, որ Ռուսաստանը աջակցություն կցուցաբերի երկու երկրի միջև սահմանազատման և սահմանագծման գործընթաց իրականացնելու համար:

«Իհարկե, գլխավոր հարցը Ադրբեջանի և Հայաստանի միջև խաղաղ պայմանագրի ստորագրումն է: Դրա համար կարևոր ենք համարում բանակցությունների վերսկումը ԵԱՀԿ Մինսկի խմբի համանախագահների հովանու ներքո»,- ասել է Փաշինյանը: