Սիրտ-անոթային հիվանդներին կորոնավիրուսի դեմ պատվաստման որևէ հակացուցում գոյություն չունի․ Բժշկական գիտությունների դոկտոր (տեսանյութ)

Սիրտ-անոթային հիվանդները կորոնավիրուսն ավելի ծանր են տանում, և ելքն ավելի անբարենպաստ է լինում, այդ պատճառով նրանց պրոֆիլակտիկան ավելի է կարևորում։ Այս մասին լրագրողների հետ զրույցում ասաց Բժշկական գիտությունների դոկտոր Համլետ Հայրապետյանը։

«Վիրուսի անմիջական ազդեցությունը կարող է լինել անմիջապես սրտի վրա և նույնիսկ հասցնել սրտամկանի ինֆարկտի, առիթմիաների։ Այն բոլոր համակարգային փոփոխությունները, որոնք կատարվում են այս վիրուսի՝ օրգանիզմ ներթափանցելու պատճառով, իրենց հերթին ազդում են սրտամկանի գործունեության վրա»,- ասաց մասնագետը։

Նա նկատեց, որ սրտի աշխատանքի ռիթմի խնդիրներ կարող են առաջանալ։ Համլետ Հայրապետյանը հիշում է պանդեմիայի սկզբնական շրջանը, երբ կորոնավիրուսի բուժման ժամանակ որոշ դեղամիջոցներ բացասաբար են ազդել են սրտի աշխատանքի վրա և խորացրել են հիվանդի վիճակը։

«Սրտային հիվանդները պետք է գտնվեն իրենց բժիշկների վերահսկողության տակ ու նրանց ավելի շատ է ցուցված վակցինացիան»,- ասաց բժիշկը։

Նա նկատեց, որ սիրտ-անոթային հիվանդության ոչ մի իրավիճակի համար հակացուցված չէ պատվաստումը։ Պարզապես կարող են լինել հիվանդության սրացման շրջաններ, որոնց ժամանակ չի թույլատրվի պատվաստումը։