«Տարածքները հանձնում էին թշնամուն, սակայն այդ տարածքներից մեր տղաներին դուրս չէին բերում կամ թողնում էին շրջափակման մեջ». Արեգնազ Մանուկյան

Այսօր՝ հոկտեմբերի 14-ին, Ազգային ժողովում հրավիրված «Արցախի Հանրապետության՝ ադրբեջանական վերահսկողության տակ հայտնված շրջաններում հայկական պատմամշակութային և կրոնական ժառանգության պահպանություն» թեմայով աշխատանքային քննարկման ժամանակԱԺ «Հայաստան» խմբակցության պատգամավոր Արեգնազ Մանուկյանը հարց էր հնչեցրել, թե ի վերջո ովքե՞ր են մեղավոր, որ ընդհանուր խուճապի ու իրարանցման ժամանակ մոռացել են պատմամշակութային արժեքների մասին:

Արձագանքելով նրան՝ Արցախի Հանրապետության Կրթության, գիտության, մշակույթի և սպորտի նախարար Լուսինե Ղարախանյանը ասաց, թե պետք չէ մեղավորներ փնտրել՝ բոլորն են մեղավոր:

«Դուք ասացիք, որ պետք չէ մեղավորներ փնտրել, բայց խնդրում եմ հստակ ասել՝ ով է թերացել, որ այսօր օկուպացված է 2000 հուշարձան, 122 եկեղեցի, 13 վանական համալիր, 52 ամրոց, 536 խաչքար: Թե չէ վերջին ժամանակներում մշակույթ է ձևավորվել ասել, որ թիվ մեկ մեղավոր չկա»,-նկատեց Մանուկյանը:

Նրա դիտարկմամբ, Արցախի պատմամշակութային արժեքները Ադրբեջանի կողմից գրավված տարածքներում մնալը առնվազն հանցավոր անգործության կամ գուցե միտումնավորության արդյունք է։

«Այսպիսի մոտեցում եղել է ոչ միայն մեր պատմամշակութային ժառանգության նկատմամբ, այլև մեր զինծառայողների նկատմամբ, որովհետև այդ օրերին մեր տարածքները հանձնում էին թշնամուն, սակայն այդ տարածքներից մեր տղաներին դուրս չէին բերում կամ թողնում էին շրջափակման մեջ։ Կարծում եմ՝ ստեղծված իրավիճակում ինչ էլ հնարավոր է եղել փրկել, մեծամասամբ եղել է անհատների ջանքերի, սեփական նախաձեռնության, սրտացավության արդյունքում։ Կարծում եմ՝ այս ամենը հնարավոր կլինի պարզել միայն իշխանափոխությունից հետո, որովհետև իշխանությունն իրեն չի կարող մեղադրել մի բանի համար, որն ինքն է կատարել»,- ասաց Արեգնազ Մանուկյանը։