Ովքեր էին Արցախի հարավում նահանջը կազմակերպում հայկական կողմից՝ կոնկրետ երկու անուն կա. Նաիրի Հոխիկյան (տեսանյութ)

44-օրյա պատերազմից հետո մի քանի անգամ զգուշացրել եմ, որ Արցախի վրա ադրբեջանաթուրքական ագրեսիայի հաջորդ թիրախը լինելու է Իրանը: Այս մասին այսօր մամուլի ասուլիսում ասաց տարաշրջանային փորձագետ Նաիրի Հոխիկյանը:

«Ինչու որովհետև, որովհետև մի քանի նախապայման կա՝ ԱՄՆ-ում իշխանության են եկել դեմոկրատները, իսկ դեմոկրատներն ԱՄՆ-ում ագրեսիվ քաղաքականության կողմնակից են: Բացի դրանից դեմոկրատները միշտ Իրանի հետ կապված բացասական գործընթացներ են տանում: Եվ ահա Ջո Բայդենի դեպքում մենք պիտի ականատես լինեինք, որ Իրանի նկատմամբ ագրեսիա պիտի լինի: Դա ոչ թե էմոցիոնալ քաղաքականության հետևանք է, այլ կոնկրետ տարածաշրջանային բիզնես շահերի»,- ասաց Հոխիկյանը: 

Նրա խոսքով՝ իր հայտարարությունից հետո իրեն մեղադրել են, որ Իրանին պաշտպանում է՝ հաշվի առնելով այն հանգամանքը, որ ինքը կոնկրետ փաստերով նշել է, որ պատերազմի ժամանակ Իրանը բազմիցս առաջարկել է հայկական կողմին ռազմական աջակցություն, իհարկե՝ ոչ բացահայտ, սակայն, հայկական կողմը մերժել է դա:

«Չմոռանանք, որ պատերազմի ժամանակ Իրանն առաջարկել է ռադիոէլեկտրոնային պայքարի միջոցներով օգնել հայկական կողմին, որպեսզի ադրբեջանցիները չկարողանան առաջանալ Ջրականից այս կողմ, որովհետև դա Իրանի ազգային անվտանգությանն էր սպառնում, բայց հայկական կողմը ևս մերժել է՝ ասելով, որ Իրանն ամերիկյան պատժամիջոցների տակ է: Չմոռանանք, որ հոկտեմբերի 18-ին Իրանն ազատվեց ամերիկյան պատժամիջոցներից, բայց իրանական աջակցություն պաշտոնապես մենք այդպես էլ չտեսանք: Բայց չի եղել, որովհետև ոչ թե Իրանը չի ուզել, այլ հայկական կողմն անարձագանք է թողել իրանի աջակցության առաջարկները»,- ասաց փորձագետը: 

Նա նշեց, որ 2021-ի հունվարին ինքը ևս մեկ հայտարարել է, որ Իրանը նորից փորձել է ռադիոէլեկտրոնային միջոցներով աջակցել հայկական կողմին՝ ոչնչացնելու թուրքական ԱԹՍ-ները, բայց հայկական կողմը կրկին հրաժարվել է այդ միջոցներից՝ պատճառաբանելով, որ դրա կարիքը չունենք: Ըստ Հոխիկյանի՝ այն ժամանակ հայկական կողմը պաշտոնապես և ոչ պաշտոնապես հերքեց այդ տեղեկությունը:

«Մենք մոռացանք, որ 2020 թվականի պատերազմի գլխավոր թիրախներից մեկն էլ Իրանն էր լինելու, որովհետև Ադրբեջանը տիրանալով Արցախի հարավին՝ կարողացավ Արաքսի հովտում տեղակայել իսրայելական և թուրքական զինված ուժերին, այնտեղ են նաև ահաբեկիչներ, վարձկաններ՝ բերված Սիրիայից: Արդեն 2021 սեպտեմբեր-հոկտեմբերին իրանական հատուկ ծառայությունների համար պարզ էր, որ Իրանի վրա լինելու է հարձակում. սա էր պատճառը, որ Իրանը զորք կուտակեց Հայաստանի Հանրապետության և Արցախի Հանրապետության գրավյալ սահմաններին»,- նշեց նա:

Հոխիկյանն ասաց, որ ադրբեջանական կողմը պաշտոնապես հայտարարում է, որ պատերազմի ժամանակ Իրանն անցել է Արաքս գետը և իր զորքերով կռվել է ադրբեջանական և իսրայելական, նաև թուրքական զինված ուժերի դեմ և կարողացել է օգնել հայկական կողմին, որպեսզի հայերը կարողանան վերադիրքավորվել և ավելի արդյունավետ կռվել Ադրբեջանի դեմ:

«Չնայած դրան՝ հայերը շարունակել են փառահեղ նահանջի ճանապարհը, իսկ ովքեր էին նահանջը կազմակերպում հայկական կողմից՝ կոնկրետ երկու անուն կա, որոնցից մեկն Անդրանիկ Փիլոյանն է, որը պատերազմից հետո ստացավ Արտակարգ իրավիճակների նախարարի պաշտոնը, մյուսը՝ Տիրան Խաչատրյանը, որը նահանջի համար Ազգային հերոսի կոչում ստացավ»:

Մանրամասները՝ տեսանյութում