«Մոնթե Մելքոնյան» ֆուտբոլային ակումբ (լուսանկարներ)

«Մոնթե Մելքոնյան» ֆուտբոլային նորաստեղծ ակումբ՝ մարզիչներ, պատանի ֆուտբոլիստներ, ձեռքբերումներ, նպատակներ, դժվարություններ և ապագայի մեծ ծրագրեր. պատմում են ակումբի հիմնադիրներն ու ֆուտբոլիստները: Ակումբը ստեղծվել է մեկ տարի առաջ Փարաքար-Թաիրով համայնքում և այս պահին ունի 3 տարիքային խմբերի ավելի քան 80 ֆուտբոլիստներ, ովքեր կանոնավոր կերպով մասնակցում են ամենօրյա մարզումներին և միջթիմային խաղերին:

Հիմնադիրներ

Հայկ Նարիմանյան-ակումբի հիմնադիր նախագահ, երկարամյա մարզիչ, զուգահեռ մարզչական գործունեություն է ծավալում «Բանանց» և Չարենցավանի «Վան» ֆուտբոլային ակումբներում: Տարբեր տարիքային խմբերի հետ աշխատելու համար ՈՒԵՖԱ-ի կողմից նրան տրվել է «Ա» կարգի լիցենզավորում:

Արմեն Կոջամանյան-ակումբի փոխնախագահ, զուգահեռ աշխատում է Ավանի ֆուտբոլի ակադեմիայում, ունի ՈՒԵՖԱ-ի կողմից տրված մարզչական գործունեության արտոնագիր և ավելի քան ութ տարվա մարզչական փորձ:

Հարություն Աբրահամյան համահիմնադիր և Արթուր Ղազարյան- մարզիչներ: Արթուր Ղազարյանը դասավանդում է նաև Ավանի ֆուտբոլի ակադեմիայում, համագործակցում «Արարատ Արմենիա» ակումբում, ունի ՈՒԵՖԱ-ի կողմից տրված «Բ» կարգի միջազգային մարզչական արտոնագիր:

Սամվել Ադամյան- ակումբի բարեկամ:

Ակումբի ստեղծման նպատակը

Հենց սկզբից որոշվել է ակումբը կոչել Մոնթե Մելքոնյանի անունով, և սա թե՛ մարզիչների և թե՛ ֆուտբոլիստների համար դարձավ պայքարելու, հաղթանակներ գրանցելու առաջին մոտիվացիան: «Մենք հերոս Մոնթեի անունն ենք կրում, իսկ դա շատ պատասխանատու և պարտավորեցնող է: Յուրաքանչյուր խաղի և ամենօրյա մարզումների ժամանակ մենք հենց այս գիտակցությամբ ենք մարզադաշտ դուրս գալիս»,- ասում են պատանի ֆուտբոլիստները:

Ավելի քան 30 տարվա ֆուտբոլային կարիերայի փորձառությամբ հիմնադիրները «Մոնթե Մելքոնյան» ակումբը ստեղծել են՝ մի քանի նպատակ հետապնդելով. նախ՝ նպաստել ֆուտբոլի զարգացմանը հատկապես մարզային համայնքներում, որոնք կտրված են մայրաքաղաքից, և տեղի պատանիները միշտ չէ, որ ժամանակ և հնարավորություն ունեն հաճախել ֆուտբոլի երևանյան հայտնի ակումբներում ու թիմերում: Մարզում նման ակումբ ունենալը լրացնում է այս բացը: Երկրորդ՝ ապահովել պատանիների ակտիվ ֆիզիկական կրթությունը և թույլ չտալ նրանց ազատ ժամանակը անարդյունավետ վատնել փողոցում: «Դեռ վաղ է ասել այս ակումբից ապագա քանի՞ լավ ֆուտբոլիստներ դուրս կգան, բայց որ ամուր, առողջ, ֆիզիկապես պատրաստված տղաներ, իսկ ապագայում բոլորը նաև լավ զինվորներ կլինեն, երկմտանք չկա»,- վստահեցնում են մարզիչները:

Ակումբի պայմանները

Նորաստեղծ ակումբում դեռ չլուծված խնդիրներ շատ կան, բայց սա ակումբի գործունեության վրա չի ազդում. ապագայի նկատմամբ լավատեսությամբ՝ մարզիչներն ու ֆուտբոլիստները շարունակում են առաջ շարժվել:

Ակումբում հույս ունեն նորոգված տեսնել Բանգլադեշ-Մերձավան մոտ 4կմ երկարությամբ ճանապարհահատվածը՝ ավտոկանգառի հետ միասին: Դա հնարավորություն կտա քաղաքային տրանսպորտի անխափան երթևեկությունն այս հատվածում, իսկ սա էլ իր հերթին այդ համայնքներից նոր մասնակիցների կբերի ակումբ:

«Մոնթե Մելքոնյան» ֆուտբոլային ակումբն առանձնանում է մյուս ակումբներից այն հանգամանքով, որ այստեղ դեռևս լիովին լուծված չէ մարզադաշտի և հանդերձարանների հարցը: Դաշտը բարեկարգման կարիք ունի, իսկ հանդերձարանները դեռ կիսակառույց են, անգամ ձմռան ցրտին ֆուտբոլիստները ստիպված են հանդերձափոխվել ոչ այնքան հարմարավետ պայմաններում: Բայց սա պատանիների համար հիասթափության պատճառ չէ: Պատանի ֆուտբոլիստները համառորեն մարզվում և համբերատար սպասում են ակումբի պայմանների բարեկարգմանը:

Մարզիչները հետևում և խրախուսում են ոչ միայն պատանիների ֆուտբոլային, այլ նաև կրթական առաջադիմությանը՝ մշտապես հորդորելով բարձր արդյունքներ գրանցել ոչ միայն մարզադաշտում, այլև դպրոցում: Ֆուտբոլիստների հետ մարզիչներն աշխատում են ոչ միայն տեխնիկա-տակտիկա զարգացնելու ուղղությամբ, այլև որպես հոգեբաններ, ինչը պակաս կարևոր չէ:

Ակումբում նաև պահպանվում են հակահամաճարակային սահմանված կանոնները: Առողջական վիճակի մասին հատուկ բժշկական քաղվածքը տեղամասային բուժհաստատությունից և յուրաքանչյուր մարզումից առաջ ջերմաչափումը պարտադիր են:

Միջթիմային խաղեր, մեծ ֆուտբոլային երազանքներ

«Մոնթե Մելքոնյան» ակումբն արդեն բազմաթիվ հաջողված միջթիմային հանդիպումներ է ունեցել Ավանի ֆուտբոլի ակադեմիայի, «Արարատ Արմենիայի», Արմավիրի «Սարդարապատ», Մուսալեռի «Վեստ Արմենիա», «Միկա», «Նոա» և այլ թիմերի ու ակումբների հետ: Ակումից ֆուտբոլիստներից ոմանք արդեն ընտրվել են՝ Հայաստանի մինչև 17 տարեկանների պատանեկան առաջնությանը մասնակցելու համար: Հոկտեմբերի 10-15-ը 05 թիմը մասնակցում է Հայաստանի ֆուտբոլի առաջնությանը:
«Սպորտը, հատկապես թիմային սպորտը, ինչպիսին ֆուտբոլն է, դրական է անդրադառնում պատանիների թե՛ ֆիզիկական և թե՛ հոգեբանական դաստիարակության վրա: Թիմային մտածելակերպ, պայքարելու-հաղթելու ցանկություն, խաղային տեխնիկա, ֆիզիկական պատրաստվածություն ունեցող, մրցակցությունից չվախեցող, ամուր կամքի տեր պատանիներ են ակումբի կազմում, ովքեր թե՛ մայրաքաղաքից և թե՛ հարակից տարբեր համայնքներից երկար ճանապարհ են կտրում-անցնում, որպեսզի հենց ազգային հերոսի անունը կրող ակումբում սկսեն իրենց ֆուտբոլային կարիերան»,- ասում են մարզիչները:

Պատանի ֆուտբոլիստներ

Սարգիս Սարգսյան- «Ակումբի հիմնադրման առաջին օրից մարզվում եմ այստեղ, Փարաքար համայնքից եմ, մեր համայնքում նման ֆուտբոլային ակումբ ունենալը մեծ երազանք էր, քանի որ ստիպված չենք շաբաթը մի քանի անգամ հասնել Երևան և մարզվել որևէ ակումբում. այստեղ և՛ մոտ է և՛ անհամեմատ մատչելի, իսկ մարզիչները շատ պրոֆեսիոնալ են: Հիմա նոր մրցաշարին ենք պատրաստվում, մի փոքր լարված ենք, որովհետև հերոս Մոնթեի անունն ենք կրում մեր մարզաշապիկներին, իսկ դա շատ պարտավորեցնող է»:

Դավիթ Հովհաննիսյանց- «Երկու ամիս է, ինչ ընկերոջս օրինակին հետևելով՝ մարզվում եմ այս ակումբում: Մալաթիա համայնքից եմ գալիս, մի քիչ դժվար է, ճանապարհ չկա, բայց, միևնույն է, ես հավատում եմ ակումբին: Իմ ու մյուսների նպատակը հիմա մեկն է՝ C խմբում հաղթենք և անցնենք B խումբ: Ես վստահ եմ, որ հաղթելու ենք»:

Հովանավորներ

Ակումբի պայմանները քիչ թե շատ բարենպաստ են դառնում հենց հիմնադիր մարզիչների ջանքերով: Նրանք են մշակում դաշտը և լուծում պարբերաբար առաջացող տեխնիկական հարցերը, և այս ամենը՝ ի շահ ֆուտբոլի զարգացմանն ու այս պատանիների վաղվա մեծ ֆուտբոլային ապագայի:

Ակումբին հովանավորել է Թաիրով համայնքի գյուղապետը՝ Դավիթ Մինասյանը, ով հոգացել է Մոնթե 05 թիմի տրանսպորտային ծախսերը: Ակումբին աջակցել է նաև CAR SERVICE CITY ընկերության հիմնադիր տնօրեն` Մհեր Հարությունյանը, Մուսա լեռ տպագրատան տնօրեն Ռուբեն Հարությունյանը։ Ակումբը ակնկալում է նաև Հայաստանի ֆուտբոլի ֆեդերացիայի աջակցությունը՝ մարզային համայնքներում ֆուտբոլային կյանքն ակտիվացնելու համար: Միշտ առաջ գնալու, նոր ձեռքբերումների ու ավելին անելու միշտ անելիք կա ակումբում: «Ուրախ կլինենք նոր համագործակցությունների ու հովանավորների հետ աշխատելու: Դեռ մեկ տարվա մեջ արդեն գրանցում ենք հաջողություններ, մարզիկների ոգևորությունն էլ անսահման է, դե պատկերացրեք ինչեր կարվեն նոր հովանավորների աջակցությամբ»:

Իսկ մեզ հետ կապվել հնարավոր է 095424212 հեռախոսահամարով կամ մեր ֆեյսբուքյան էջի միջոցով