Տիկին Պողոսյան, կողմ քվեարկելու մասին կատակ մի արեք՝ մեր գործընկերները կոգևորվեն ու կհրաժարվեն փողոցային պայքարի իրենց օրակարգից․ Ղազինյանը դարձյալ չընտրվեց

Արդեն 7-րդ անգամ ՀՀ ԱԺ պաշտպանության և անվտանգության հարցերի մշտական հանձնաժողովը կազմակերպում է հանձնաժողովի նախագահի տեղակալի ընտրության հարցը։

Հիշեցնենք, որ նախկին 6 նիստերի ժամանակ, «Հայաստան» խմբակցության կողմից որպես հանձնաժողովի նախագահի թեկնածու առաջադրված Արթուր Ղազինյանը չի ընտվել։ 

Այս անգամ ընդդիմադիրները չէին ներկայացել արտահերթ նիստին։ Հանձնաժողովի նախագահ, ՔՊ-ական Անդրանիկ Քոչարյանը նկատեց, որ ինքը տեղյակ չէ, թե ինչու ոչ ոք չի մասնակցում։ Նա կարծիք հայտնեց, թե եթե չեն եկել, ուրեմն փորձում են թաքցնել իրենց թեկնածուին։

Արթուր Ղազինյանի թեկնածությանը կողմ ու դեմ քվեարկողներ չեղան։

Իշխանությունը ձեռնպահ քվեարկեց։

ՔՊ-ական պատգամավոր Քրիստինե Պողոսյանը կատակեց, թե կողմ է քվեարկում, ինչին  Անդրանիկ Քոչարյանն էլ արձագանքեց. «Տիկին Պողոսյան, այդպիսի կատակներ մի արեք, որովհետև հուսախաբ եք անելու, մեր գործընկերները կարող է ոգևորվեն ու հրաժարվեն փողոցային պայքարի իրենց օրակարգից»։

Հերթական նիստը կկայանա հոկտեմբերի 19-ին։