Տոնոյանի փաստաբանների հայտարարությունն ազդակ է կառավարությանը, Ժողովրդական լեզվով ասած՝ դեռ աչքով են տալիս․ Վարդևանյան

Ես առհասարակ վարչապետ-իրավապահ մարմիններ սերտ համագործակցությունը չեմ կարողանում ընկալել, որովհետև կարդացել եմ քրեական դատավարության օրենսգիրքը և այնտեղ որպես քննիչի, դատախազի վերադաս գրված չէ վարչապետ։ Այս մասին լրագրողների հետ զրույցում ասաց ԱԺ «Հայաստան» խմբակցության պատգամավոր Արամ Վարդևանյանը։

«Ինձ համար սա աննորմալ երևույթ է»,- ասաց պատգամավորը։

Նա նաև նկատում է, որ Պաշտպանության նախկին նախարար Դավիթ Տոնոյանի ձերբակալությունից առաջ այդ մասին տեղեկացրել են Նիկոլ Փաշինյանին, մինչդեռ այդ ձերբակալումը նախաքննական գաղտնիք է։

Անդրադառնալով Դավիթ Տոնոյանի պաշտպանների հայտարարությանը, որտեղ նշել են, թե «Դավիթ Տոնոյանը տիրապետելով տեղեկատվության մեծ ծավալի՝ այն չի օգտագործում հանրային տիրույթում», Արամ Վարդևանյանը նկատեց, որ դրանով պաշտպաններն ազդակ են տալիս, որ վերքննիչ քրեական դատարանում գործը չմակագրվի Արմեն Դանիելյանին, որ կալանավորումից ազատելու հարց առաջանա:

Ճշտող հարցին, թե դա գործարք է իշխանության հետ՝ պատերազմում պարտության առնչությամբ լռելու համա՞ր, Արամ Վարդևանյանը պատասխանեց.

«Ես կարծում եմ՝ դեռ ազդակն է: Ժողովրդական լեզվով ասած՝ հիմա դեռ աչքով են տալիս»,- ասաց Վարդևանյանը։

Նա զերծ մնաց այլ մեկնաբանություններից՝ նշելով, որ ամեն դեպքում խոսում ենք պաշտպանության նախարարի մասին, որը ոչ միայն անորակ զենքի հետ առնչություն ունի, ըստ ԱԱԾ-ի, այլև ՀՀ ամբողջ անվտանգության և պաշտպանության ամենախայտառակ, ամենադաժան ու ծանր էջի հետ առնչություն ունի: