ՔՊ-ական պատգամավոր Խաչատրյանը նպատակ ունի հանրության շրջանում Առուշանյանի նկատմամբ բացասական վերաբերմունք ձևավորել. պաշտպան

Այն, որ Գորիսի համայնքապետ Առուշ Առուշանյանի և համայնքապետի տեղակալների նկատմամբ հարուցված քրեական գործերը քաղաքական բնույթ են կրում, Առուշանյանի պաշտպան Էրիկ Ալեքսանյանը դրանում ոչ մի կասկած չունի։ Այդ մասին նա ասել է «Զանգեզուր TV»-ի եթերում:

Ալեքսանյանը իր հարցազրույցում արձագանքել է Գորիսում ՔՊ թեկնածուի քարոզարշավն ակտիվ իրականացնող, ԱԺ ՔՊ խմբակցության պատգամավոր Արմեն Խաչատրյանի հայտարարությանը:

Վերջինս ասել է, թե` եթե անձին մեղսագրվող հանցանքը ընտրական հանցագործությունների հետ կապ չունի, ուրեմն հետապնդումն էլ քաղաքական չէ։

«Քաղաքական հետապնդումը նշանակում է, որ այս կամ այն քրեական գործի վերաբերյալ գործադիր իշխանությունը կարող է ունենալ ակնկալիքներ կամ շահագրգռվածություն։ Մենք գիտենք, որ պարոն Առուշանյանի նկատմամբ քրեական հետապնդումները որևէ աղերս չունեն իրավաբանության հետ, այդ գործերը շինծու են և ապօրինի, որևէ իրավական հիմք չեն պարունակում և միշտ գտնվում են գործադիր իշխանության տեսադաշտում, ուշադրության կենտրոնում, միշտ իրենց կողմից քննարկման առարկա են դառնում։ Դա է պատճառը, որ մենք բնորոշում ենք՝ քաղաքական հետապնդում»,- ասել է Էրիկ Ալեքսանյանը։

Փաստաբանն ուշադրություն է հրավիրել նաև այն հանգամանքի վրա, որ ՔՊ-ական պատգամավոր Խաչատրյանը Առուշ Առուշանյանի նկատմամբ իրականացվող հետապնդումների շրջանակում առկա հոդվածների քանակը միտումնավոր շեշտում է՝ դրանով նպատակ ունենալով հանրության շրջանում Առուշանյանի նկատմամբ բացասական վերաբերմունք ձևավորել՝ ակնկալիքով, որ դա իր ազդեցությունը կունենա Գորիսում կայանալիք ընտրությունների արդյունքի վրա։

Խաչատրյանի մեկ այլ հայտարարությանը, թե Առուշ Առուշանյանը, իր տեղեկություններով, մարտական որևէ գործողության չի մասնակցել, պաշտպանն արձագանքել է․

«Այսինքն, Արմեն Խաչատրյանը չունի ստույգ տեղեկություններ։ Նրա «իմ տեղեկություններով» ձևակերպումը դա է հուշում։ Բոլորը գիտեն, թե Առուշ Առուշանյանը, բացի մարտական գործողություններին մասնակցելուց, ինչ այլ գործողություններ է կատարել պատերազմի ժամանակ՝ քաղաքացիներին օգնություն տրամադրելով»։