Հայաստանում 10 բնակչից 3-ն աղքատ է. սոցիոլոգ

2014թ.-ին Հայաստանի աղքատության մակարդակը կազմել է 30 %, այսինքն երկրի 10 բնակչից 3-ը վերին աղքատության գծից ցածր է գտնվել:

2013թ.-ի համեմատ արձանագրվել է աղքատության մակարդակի զիջում 2 տոկոսային կետով:

Newspress.am-ին սոցիոլոգ Ահարոն Ադիբեկյանը Հայաստանում աղքատության մեթոդաբանության վերաբերյալ պարզաբանեց, որ օրական մեկ դոլար մեկ շնչին ընկնելու դեպքում անձը համարվում է ծայրահեղ աղքատ, իսկ երկու դոլարի դեպքում՝ աղքատ:

«Սյուբյեկտիվ բաղկացուցիչ է, թե ինչպես է անձը ընկալում իր տնտեսական վիճակը, եթե վերցնում են ՄԱԿ-ի տվյալները, ապա մեր երկրի ընտանիքների 50 տոկոսն է աղքատ»,- ասաց սոցիոլոգը` հավելելով, որ սուբյեկտիվ աղքատության ցուցանիշը 19 տոկոսից իջել է 15 տոկոսի:

«Մարդը համարվում է ծայրահեղ աղքատ, երբ չի կարողանում սնվել: Երբ հազիվ է սննդին հերիքում` աղքատ է: Երբ ոչ միայն սնվում է, այլև կարողանում է այլ իրեր գնել, ապա՝ համեստ, իսկ այն ընտանիքը, որ ծախսերում սահմանափակումներ չի մտցնում՝ ունևոր է»,-բացատրեց Ադիբեկյանը:

Ըստ նրա, Հայաստանի 10 տոկոսը ունևոր է և Հայաստանում աղքատության ցուցանիշները դեռ կայուն են:

Ահարոն Ադիբեկյանը նկատեց, որ բարձր վարձատրվող ոլորտներից է Տեղեկատվական տեխնոլոգիաների, նաև հանքարդյունաբերության ոլորտը, իսկ այն, որ պղնձի և մոլբդենի գները նվազում են, սոցիոլոգը եզրակացրեց, որ հավանական է, որ այս ոլորտում աշխատավարձերը նվազեն:

Նշենք, որ Հայաստանում 2014թ.-ին աղքատների ընդհանուր թվաքանակը կազմել է շուրջ 900 հազար մարդ, նրանցից ավելի աղքատների թվաքանակը`մոտ 330 հազար, իսկ վերջիններից ծայրահեղ աղքատների թվաքանակը` մոտ 70 հազար մարդ:

Հիշեցնենք, որ այսօր աղքատության դեմ պայքարի միջազգային օրն է: