Ասում ես՝ ուսուցիչն իր աշխատածի չափով է ստանում, բա դուք՝ նախարարնե՞րդ, ինչքան եք ստանում, ձեր աշխատածի չափո՞վ․ Պետրոսյանը՝ ԿԳՄՍ նախարարին (տեսանյութ)

Շատերն այսօր նախարարներին դեմքով չեն ճանաչում կամ չգիտեն անուն-ազգանունը, որովհետև իրենք իրենց տեղում չեն ու իրենց գործով չեն զբաղվում։ Այս մասին ասուլիսի ժամանակ ասաց նախկին պատգամավոր Գևորգ Պետրոսյանը։

Նա անդրադարձավ թոշակների խնդրին և նկատեց, որ պարզապես ծաղր է թանկացումների նման սրընթաց աճի ֆոնին ասել, թե թոշակները եկող տարի 2100 դրամով կավելանան։

«Ամոթ է, գոնե մի՛ ասեք, թե բարձրացնում եք թոշակներ»,-ասում է Գևորգ Պետրոսյանն ու հավելում, որ դա պարզապես ծաղր է։

Նա նաև ծաղր է համար ԿԳՄՍ նախարար Վահրամ Դումանյանի հայտարարությունը, թե «ամեն ուսուցիչ իր աշխատածի չափով է ստանում»։

«Դումանյանն ինձնից տարիքով մեծ է ու ես չեմ ուզում վիրավորական բառեր ասեմ, բայց նա բացահայտ ծաղրում է ուսուցիչներին։ Մի հարցնող լինի՝ դու ո՞վ ես, որ ուսուցչին ծաղրում ես»,-նկատեց Պետրոսյանը։

Նա իր հարցն ուղղեց նախարարին․ «Ասում ես՝ ուսուցիչն իր աշխատածի չափով է ստանում, բա դուք՝ նախարարներդ, ձեր աշխատածի չափո՞վ եք ստանում։ Ամբողջությամբ պարալիզված է կրթական համակարգը»,-ասաց Պետրոսյանը։

Նա նաև նկատում է, որ շատ ուսուցիչներ, դաստիարակներ ու դասախոսներ ամսվա վերջին դժվարանում են կոմունալները վճարել։

«Շատերն անգամ հացի գումար չունեն, պարտքով են հաց վերցնում, իսկ դու անամոթաբար ասում եք՝ իրենց աշխատանքի համեմատ»,-ասաց Պետրոսյանը։

Մանրամասները՝ տեսանյութում