Պատերազմի սպառնալիքը միշտ էլ կա, բայց չեմ կարծում, թե հիմա մարտական գործողություններ կլինեն. Սեյրան Օհանյան (տեսանյութ)

Եթե նկատել եք՝ իշխանությունները ուժային կառույցների ուժն օգտագործում են ավելի շատ երկրի ներսում, քան արտաքին անվտանգության հարցում։ Այս մասին լրագրողների հետ ճեպազրույցում ասաց ԱԺ «Հայաստան» խմակցության ղեկավար Սեյրան Օհանյանը։

Նա նկատում է, որ 1 տարվա ընթացքում լիարժեք գնահատական չի տրվել այն բոլոր ուղղություններին, որոնք անհրաժեշտ են մեր երկրի հետագա զարգացումն ապահովելու համար:

«Այս պատերազմը արդյունք է ոչ միայն Ադրբեջանի կողմից սանձազերծած ոտնձգության, այլ այն պարտվողական քաղաքականության, որ իրականացվել է 2018-ից սկսած: Ձախողվել է արտաքին քաղաքականությունը, չի օգտագործվել բանակցային ամբողջ ներուժը, հարվածի տակ են գտնվել բանակը, անվտանգության համակարգը, և Ադրբեջանը, օգտվելով այս իրավիճակից, սկսել է պատերազմական գործողություններ: Այսօրվա ձախողումների շարունակությունը այս իշխանությունների առկայության, նրանց ոչ գրագետ, ոչ հետևողական աշխատանքի հետևանք է, և ամեն օր դա տեսնում ենք սահմանային իրավիճակում»,-ասաց նա նշելով, թե «Հայաստան» դաշինքի, խմբակցության նպատակների մեջ է այն, որ ՀՀ ղեկին պետք է լինի նոր իշխանություն, որը կարող է բանակցել և օգտագործել այն ամբողջ ներուժը, որ 27-30 տարիների ընթացքում մենք ձեռք ենք բերել:

Անդրադառնալով սահմանային իրավիճակին՝ Օհանյանը նշեց. «Ես կարծում եմ՝ պատերազմի սպառնալիքը միշտ էլ կա, բայց այս իրավիճակում, մոտ ժամանակահատվածում, կարծում եմ, մարտական գործողությունները դեռևս հեռանկարային են, չեմ կարծում, թե հիմա պատերազմ կլինի»: