Խոստումներով որդեկորույս մոր սիրտը չեք սփոփի. Սահմանն ամրացրեք, պարոնայք իշխանավորներ

Ու ինչքան, ինչքան պիտի 18-19 տարեկան մեր երեխեքը մատաղացու գառների կարգավիճակում սահման պահեն։ Ու մինչև ե՞րբ պիտի թշնամին գա, հասնի խրամատ ու հետո… Որ ճոխության, ցոփության մեջ ապրող իշխանավորներն ամեն բացվող օրվա հետ ավելի պարարտանան, ավելի դիզեն։ Իսկ խեղճ ու կրակին ամեն նոր օրը մի նոր դարդ ու նոր վիշտ ավելացնի, մի նոր գույժ բերի, ընտանիքի մի ճրագ հանգի, մի մոր սիրտ մարի ու մղկտա։

Ու հետո՝ բազմիցս կրկնված արտահայտությունը.

«Հակառակորդի սադրիչ քայլերն անհետևանք չեն մնալու: Պատասխանը լինելու է ցավոտ և անդառնալի կորուստներով լի»։

Անդառնալիից հետո  ո՞ւմ են պետք ձեր խոստումները։ Ո՞ր որդեկորույս մոր սիրտը կսփոփովի, իր տան ճրագի դիմաց  թեկուզ մի սուրու ոչխարի ալահի գիրկն ուղարկելը։

Դրա փոխարեն՝ սահմանն ամրացրեք, անվտանգությունը բարձրացրեք։  Հատուկ սարքեր տեղադրեք։

Պարոնայք գեներալներ ու իշխանավորներ. 21-րդ դարն է, իսկ սահմանին, որպես ազդանշանային համակարգեր, պահածոյի տուփերն են դեռ  շարվում։

Բազմիցս ասվեց ու գրվեց հայ գիտնականների կողմից ստեղծված գերժամանակակից ու գերզգայուն էլեկտրոնային սարքերի մասին, որոնցով սահմանը վերահսկելու դեպքում ոչ մի դիվերսանտ աննկատ չի մնա։  Ինչո՞ւ չի արվում…

Ե՞րբ պետք է վերջապես հասնեք այն գիտակցության, որ ամենամեծ արժեքը սեփական  զինվորի կյանքն ու առողջությունն է, այլ ոչ թե՝  կորուստների համեմատականը։

Համարժեք պատասխանն իր տեղին, բայց նաև՝ համարժեք անվտանգություն ապահովելու ուղղությամբ մտածեք։

Արմինե Մկրտումյան